Ducati factory team tan season khat a hmannaah a vawi sarih nan MotoGP-ah Marc Markez a champion a, Italian rider ropui Valentino Rossi-a champion zat a nih rual.
Chawlhni khan Japanese Grand Prix-ah Ducati factory rider pahnih an chungnung a, a hmasa berah Francesco Banai-a thlengin a kawppui Markez chuan a dawt a, pakhatna ni lo mah se kum 32 mi Spaniard hian world champion a nih theihna tura a mamawh point a thawk chhuak a ni.
Tun season-ah grand prix panga a la awm a, hetih lai hian championship hmahruaitu Markez chuan point 201-in amah hnaih ber, a nau Alex Markez a kalsan tawh a, rider pakhat tan point 185 bak a hmuh theih tawh loh a ni.
Markez hian Honda bike a khalh laiIn vawi ruk MotoGP title a la tawh a, kumin atangin Italian team Ducati zawmin hneh takin championship a thunun nghal a, 2019 hnua MotoGP world champion a nih leh hmasak ber a nih rualin, Rossi-a’n motorcycle inelna sang bera world title a lak zat vawi sarih bakah inelna hrang hranga world champion vawi kua a nih tawhna a nih rual tel bawk a ni.
Italian mi hrang dang Giacomo Agostini chuan 1968 atanga 1975 chhungin motorcycle inelna sang berah world title vawi riat lain champion tam ber a ni a, Markez hian tluk turin vawi khat MotoGP champion nih a la mamawh a ni.