Pathianni tuk khan Delhi-a sikul leh institute 300 chuang leh thlawhna tumhmun tam takin bomb hmanga tihthaihna an dawng a, a hnuah tihderna, a lem mai mai a ni hlawm tih hriat chhuah leh vek a nih thu thuneituten an sawi.
Pawl pakhat, ‘Terrorizers111’ an tihten email hmangin heng hmunte an bul hnaiah bomb a awm tiin an hrilh hlawm a ni.
Message-te hi zing dar 06.08-ah Delhi-a sikul leh institde 300 chuang email address-a an inbox-ah a rualin a lut a. Ram chhunga thlawhna tumhmun hrang hrang pawhin dawngin Delhi Airport pawh a dawng zingah an tel tih police hotuin a sawi.
email thupuiah hian ‘In building chhehvelah bomb dah a ni a, chet i la dawn nge chhiatna i hmachhawn dawn?’ tih dah a ni a. “Sikul leh tumhmun thununtute hnenah, kei hi fifiak pawl, terrorizers 111 hruaitu ka ni a, he khawvel leh vanramah pawh tute mahin kei hi min khawih phak loh ka ni a, kei hi tiam chin nei lo ka nih avangin keimah ngei pawhin tiam chin min nawr thleng thei lo va, sual fa ka ni a, inhuatna hi ka ninphung a ni,” tiin mail chhungah hian a inziak bawk a ni.
“Bomb-te hi in building chhehvelah dah a ni a, darkar 24 chhunga in che lo a nih chuan thisen luang in hmachhawn ang,” tiin a inziak zui bawk.
Delhi Fire Services-a hotute chuan tihthaihna dawng sikul zingah hian Dwarka-ah CRPF Public School leh Qutub Minar bula Sarvodaya Vidyalaya an tel thu an sawi.
“Police team, kang thelhtu leh bomb disposal unit ten rang takin sikulah hian tirh niin ngun takin an dap a. Engmah hmuh chhuah tur a awm lo va, rinhlelhawm a awm lo,” an ti.
Tun hnaiah India khawpui bera zirna inte hian bomb kam anga tihthaihna an tawng nasa hle a. Chawlhkar khat awrh liam taah khan DPS Dwarka, Krishna Model Public School leh Sarvodaya Vidyalaya tam tak telin sikul eng emaw zatin hetiang tihthaihna hi an lo dawng tawh.
September 9 khan University College of Medical Sciences (UCMS) pawhin hetiang hi a dawng a; mahse, a hnuah a lem mai mai a ni tih hriat chhuah zui a ni.
Hemi ni vek hian Maulana Azad Medical College leh Delhi Secretariat chu tihthaih a ni bawk a, hengte pawh hi engmah lo a ni tih hriat zui a ni.