Khawvel ram tam takah eizawnna atana an hman pui ber chu tourism hi a ni a. Kan ram mawina hi khualzin hip theihna tura tha ber pawl a ni. Vairam hmun zawla chengte tan chuan tlang thawveng vel ringawt pawh hi nun hahdam sawng sawngna khawp a nuam a ni. Chuti chu nimahsela midang tana tlawh chakna boruak ka siam loh chuan tumahin rawn zin an chak lova. An rawn zin huai huai duhna tura kan inbuatsaih a ngai. Mikhual ten nuam an tih em emna tur boruak kan siam chuan kan ram sum leh pai lama changkan dawrhna khawp a ni thei thung ang.
Kan sorkar lam pawhin mikhual lo zin duhna turin programme chi hrang hrang a buatsaih a. Mikhual hip nan festival chi hrang hrang huathawtna tur a duang tam hle. Lunglei music festival, Anthurium festival Reiek ah, Hnahsin kut Champhai, winter festival, Aizawl etc a awm dawn. Chung intihhlimna ringawt ni lo, khualzinte tlawh chak tur Sialsuk tlang, Phawngpui tlang, Murlen park leh a dangte pawh a la tam bawk.
Kan hmun neihte hi khualzinte tan a nuam em em hlawm a. Khawvela khualzin ten hmun mawi leh nuam an tih ang hi chu kan nei ve deuh fur a. Vaiho leh foreigners te hian an la dai pawp ngai loh Mizoram hi lo zin an chak hle. Kan ram ralmuanna avang ringawt pawh hian chawlh hahdam nan an it thin.
Mahse hetiang hmun hi nei mah ila mikhualte tan an la zin ngai lohna hmuna chet vel zung zung awlsamna tur hian kalkawng tha kan nei lova. Kalkawng zin man a to em em a. Sairang atanga Aizawl taxi chuan man chu rela Guwahati thlenna man nen a inzat reng mai. Khawchhak lam Murlen thlenna phei chu to tak a ni. Sialsuk tlang emaw kal tur chuan a kal man a to hle bawk. Chutiangin Reiek kal ringawt pawh khualzin tan in sen fe ngai vek a ni. Kalkawng man chungchangah hian sorkarin rate mumal deuhte a neih a ngai a. Rate chungchangah motor neitu lam association te nen sawihona neih a rate bithliah an neih fel a ngai. Khualzin vaiho pawh hi inkhawl ker kera lo zinte an ni ve hlawm a. An tlin tawk awm kan ngaihtuah pui a ngai a, an phak tawk kan ngaihtuah tel tho a ngai bawk. Rate sang ringawt aiin an lokal tam hrim hrim hian kan hlawk zawk dawn tih ngaihtuah tel ila.
Heng bakah hian kawngkam dawrte pawh hian khualzinte ei duhzawng an lo hlui ve a ngai. Tuna kan kawngkam dawr ringawt angah hi chuan mi an hip tawk lo thei. Mi chi hrang hrang kan tam tawh dawn avangin eitur pawh chi hrang hrang an neih tam a ngai.
Tin, khualzinte hi kan tawng thiam lo vek an ni dawn. Khualchhawn thei tura kan inbuatsaih a ngai. Saptawng leh vaitawng tlanglawn talte hi thiam tum a tha. Chu chu sumdawnna atan a ni si a. Khualchhawn turin sorkar ringawt ni lo in mipui pawh i inbuatsaih mup mup ang u.