Aizawl: Dampa bial by-election neih tura INC candidate John Rotluangliana chuan campaign tanin, nimin khan Aizawl leh Reiek a tlawh a. Tun tum by-election-ah chuan chak ngei a inbeisei tih a sawi.
He’ng khua a tlawhnaah MPCC Vice President ni bawk John Rotluangliana chuan, Dampa bialah din a inbeisei tawh lo va; mahse, Congress party-a an hotute’n Dampa bial chhunga an unit-te’n a hming lo chu lam an neih loh avangin an din tir ta tih sawiin, “Min lo dawnsawn dan hi ka rin phak loh a ni a, ka lawm a, ka lung pawh a chhe hial a ni. Mi tam takin min phone a, party a nihna nei lo te pawhin ‘kan pui duh che’ an ti a,” tiin, lawmthu a sawi.
Kum 2023 khan Dampa bial chu a ta turah a lo ngai tawh tih sawiin John Rotluangliana chuan, “Mahse, a remchang ta lo va. Tunah hian kan chak ngei ka beisei. MNF Candidate chuan sum tam tak, damchhung ei an nei tawh a, keini chuan Pathian bak chhuan tur kan nei lo. Lo zam suh u! Ka tawngtainaah chuan, ‘Lalpa Dampa bial mipuite rilru min pe rawh’ tiin ka tawngtai a, a chhanna kan hmu a, Ailawng leh Reiek kan Campaign na hmasa berah mithar nen min lo hmuak a, lawmthu ka sawi duh a ni,” tiin, Dampa bialah hian by-election a awm apiangin a dawtah Congress an sorkar thin tih a sawi.
MPCC Adviser Zodintluanga Ralte pawhin thu sawiin, “Tunah hian ZPM an sorkar a, hun dang ang chu nise ZPM tling ngei tura ngaih a ni a. Tunah chuan Congress leh MNF te inbei tura ngaih kan ni,” tiin, ZPM Candidate tur Vanlalsailova chu ZPM Headquarters-in TV ah interview nei tawh lo turin order an chhuah hnan niin a sawi.
Zodintluanga Ralte chuan, “ZPM sorkarin ration buhfai man a letin a tito a, Minister a nih lai khan Pu John Rotluangliana’n sorkar tan sum sen a nasat avangin tito tura nawrna tawk thin mah se, thingtlang mite dinhmun a hriat avangin mipui tawrhna thlen thei anih avangin a ti sang duh lo,” tih sawiin, a minister lai khan petrol leh diesel man takngial pawh a tihsan duh loh thu a sawi bawk.