Champion lai Khawhaiin tournament hawn nan Zonuam an khelhpui dawn a, vawiin atangin R Dengthuama Indoor Stadium, Mualpuiah GIG Motors Inter Village Volleyball inelna tan a ni ang.
Dar 10-ah tanin inkhel hmasa berah Zomuansanga, Saidingpuia Sailo leh Lalhmunmawia te telna Khawhaiin Zonuam an khelhpui dawn a, an chak a nih chuan inrinniah Luangmual leh Sihphir Venghlun chak zawk nen an inhmachhawn zui ang.
Ni hmasa berah mipa inkhel tum 12 awmin inkhel tur zingah YMA volleyball champion ni tawh Chanmari West leh Saitual an tel a ni. A tuk ninganiah erawh mipa inkhel vawi 10 a awm ve thung dawn a, 2024 YMA volleyball champion Muanna Vengin Hmuifang an khelhpui dawn a ni. Zirtawpniah Inter Village tournament hnuhnung vawi hnih, 2019 leh 2023-a final lut Huntharin Kulikawn an khelpui dawn a, kar leh thawhtanni atangin hmeichhe inelna tan a ni ve thung ang.
Mizoram Volleyball Association buatsaih veng leh khaw hrang hrang inelnaah hian team 78, mipa 64 leh hmeichhia 14 an tel a, hmeichhe lamah tournament hnuhnung pahniha champion lai Kolasib Diakkawn leh final lut zawn thei Thenzawl East an tel lo ve ve a, YMA volleyball-a champion zing ber leh champion lai Bungkawnin kar leh thawhlehniah tournament bul tanin Lawipui an khelhpui dawn a, tunlaia player tha Lalramliani leh Remlalnghaki telna Dawrpui Vengtharin kar leh nilainiah Lungdai leh Phunchawng chak zawk hmachhawnin bul an tan ve thung dawn a ni.
Inter Village tournament hnuhnung ber 2023 khan team 107 telin tun tumah team 29-in tel an tlem zawk a; hetih lai hian 2019 aiin team riatin tel an tam zawk a, LPS Vision chuan a tir atangin cable TV leh youtube channel-ah live-in a pe chhuak dawn a, Mizoram Volleyball Association youtube channel-ah live-a pek chhuah a ni bawk ang.