LPS Vision Production buatsaih Mizo Talent 2025 atanga kan hmelhriat Magician, beatboxer, Saxaphone tum thiam leh lam thiam te’n inthurualin ‘Talent Tribe’ tia hming in vuahin October ni 1,2025 zaninah Vanapa Hall-ah Show an nei dawn a, an sum hmuh chhuahte hnuchham in ‘Motherless Baby home’ tanpui nan an hmang dawn.
Mizo Talent 2025 Winner Vanlalhlupuia, runner up – 2 Magician, Lucy Lalthazuali leh Top 10 a in hlang kai TG Reeds te chuan Team dinin ‘Talent Tribe’ tih an in vuah a, an fans te tan zaninah show buatsaih an tum a, he show ah hian a mal theuhin an talent te an pho chhuah dawn bakah a huhoa in an in lan dawn bawk.
An ruahman dan chuan Theatre Drama type in show hi kalpui an tum a, an inbuatsaih ngawrhin, hetianga Talent hrang hrang in fin khawma show buatsaih hi Mizoramah en tur a tam lo a, a hmunnawm hle tura ngaih a ni.
Talent Tribe te hi ngawrh taka inbuatsaih an ni bawk a, lam hmuhnawm tak thlir tur a awm dawn a, Magician te pahnih pawhin chet bon an tum, Beatboxer leh Saxaphonist te hian beng an ti tlai hle tura ngaih a ni.
Zaninah mit leh beng titlai turin Vanapa Hall pan ang aw…