Aizawl: Mizoram Youth Commission (MYC) Chairman Malsawmzuala Ralte hovin nimin khan MYC-in Handholding Scheme hnuaia a kalpui tur, mi ina awm/awmpuite felfai taka inkaihhruaina, MaidConnect Project chungchang sawi hovin MYC Conference Room-ah an thutkhawm.
MaidConnect Project hnuaiah hian Mizo thalaite, a bikin mi ina awm/awmpui/nula te an awmna tur mumal taka zawnpui an ni dawn a, an awmna turte nen pawh inremna mumal tak siam thin a ni ang a. Training pek thin an ni ang a, hlawh chungchang pawh fel taka bituk a ni ang.
Employees State Insurance Scheme/ESI ah ziah luh an ni ang a, an awmna ten hlawh an pek atangin percent tlemte an pek sak ang a, damloh nikhuaah pawh chumi hmang chuan an inenkawl thei dawn a ni.
Hei bakah police verification tih tir an ni vek bawk ang a, hemi hmang hian harsatna leh buaina a awm thulhah pawh rang taka chhui chhuah theih a ni dawn a ni.
Awmpui mamawh ten pawisa chawia zawn sak theite an dawr thin pawh Maid Connect hmang hian mumal taka khuahkhirh a ni ang.
Hei hi registration mumal tak nen a kalpui a, background check nen thlapa kalpui a ni dawn a ni.
MaidConnect project hi kumthar atanga felfai taka kalpui tum a ni. Project hi MYC in a kalpui hunah chuan MYC Office ah hian Officer kaihhruaina hnuaiah MaidConnect Cell din a ni dawn a. He Cell hian registration, verification, training te an lo buaipui dawn a ni.