Afghanistan-a Taliban sorkar chuan hun eng emaw chen internet leh telecom service a tihtawp hnuah a tinung leh ta a, Afghan-ten nasa takin khawlaiah chhuakin an lawm.
Tual chhung chanchinbu mite chuan inbiakpawhna a hman leh theih ta tih an sawi a, hetih lai hian internet monitor Netblocks chuan network data chu ‘hmun thenkhatah’ tihnun leh tawh a ni tih an sawi thung.
Sorkar thuneitu sang pakhat chuan BBC Afghan hnenah internet hi Taliban prime minister thupek anga tihnun leh a ni tih a hrilh.
Darkar 48 chhung hman theih loh a nih chhung khan sumdawnna leh thlawhna veivak a buai phah hle a, rikrum atan chauh hman theiha tih a ni a. A bikin hmeichhia leh hmeichhe naupang, kum 2021-a Islamist la run takin an rama ro an rel leh hnua an hrekna na tak tuartuten an tawrh zual hle rin a ni.
Nilaini zan khan an khawpui, Kabul-ah chuan internet a nung leh ta tih inhrilhin Afghan tam tak khawlaiah an tei chhuak a. Mipa pakhat chuan, “Kan vaiin kan hlim a, an cell phone an la a, an lainate an bia a. Hmeichhia pawh, mipa pawh, Talib (Taliban mite) pawhin an service a that leh chiah chuan an phone an khawih a, khawlaiah mi an tam hle,” a ti.
Qatar-a Taliban thupuangtu, Suhail Shaheen-a chuan ‘inbiakpawhna zawng zawng’ chu Nilaini chawhnua a that leh vek hman tawh tur thu a sawi.
Taliban sorkar hian an tihthih chhan erawh an la puang chuang lo zel.
Thla hmasa khan hmar lam, Balkh province governor thupuangtu chuan ‘sual laka inven nan’ internet tihtawp a ni dawn tih a lo sawi tawh thung.
Taliban hian thuneihna an chan leh hnuah Islamic Sharia law hmangin dan khirh tak tak an kalpui a. Hmeichhiate an thunun nasa zual a, kum 12 chung lam lehkha zir an phalsak loh avangin an tan chuan internet hi khawvel dang an banphak ve theihna awmchhin a ni.
Internet a thih chhung khan Kabul laili takngial pawh a reh hle a, bazar pawh a ruak deuhthaw a. Pawisa inthlengna pawh a buai a, ram danga an chhungte awm pawhin pawisa an thawn thei miah lo a ni.
Travel agent-te an inkhar a, a inkhar lo pawh anmahni dawrtute hnena thil awm dan hrilh tur chauhva inhawng an ni a. Thlawhna lut leh chhuak a awm lo vek bawk.