Aizawl: Hmar Students’ Association (HSA) Joint Headquarters, Aizawl buatsaihin Ningani khan Art & Culture Auditorium, Berawtlang, Zemabawkah HSA Day vawi 87-na lawmna leh Freshers’ Social an hmang a, Mizoram Assembly Speaker Lalbiakzama’n khuallian niin a hmanpui a, Lalringdika, IPS, Commandant, 3rd Battalion MAP chu khualzahawm a ni.
Khuallian chuan zirlaite leh hruaitute fuihin rilru puitling tak pu turin a chah a. Hmar chanchin sawiin Mizo khuaa pasaltha leh tlawmngaiten ral laka khaw veng him tura daifemahte in leh lo an din thin ang maia Zofate ram china daidotute an nih thu a sawi.
Zofate kulh bang, hnam ralvengtute an nig thu sawiin anni hi awm lo ta sela chuan Zofate ram luah chin hi tun aia a zim tur thu a sawi bawk.
HSA chu Mizo culture tihausatu an nih inhre reng tur leh inpumkhat leh inlungrual taka ke penpuiah a sawm a bawk.
Vawiin hun hmannaah hian Hmar mite zinga eizawnna leh zirna kawnga mi hlawhtlingte chawimawina hun hman niin Indian Police Service (IPS) tharte zinga pahnih – Lalringdika, 3rd Battalion MAP Commandant leh J. Lalthafamkima, Director, ACB bakah ICFAI University Vice Chancellor Dr. Ginlianlal Buhril te, MBBS zo mi panga – Lalduhawmi, Nancy K Lallawmzeli, Lalnunthari, Roneikim leh Vanlalhruaitluanga te, B.Sc Environmenral Science 2nd Rank Holder Lalmalsawma; LLB zo pahnih – Rejoy Lalnunpuia leh Lalnunsiami te bakah B.ed zo Lalhmangaihzuala leh MMA Fighter Nazareth Lalthazuol te chawimawina hlan an ni.
HSA hi October 3, 1939 khan Imphal, Manipur-ah din a ni a, Mizoramah July 13, 1986 khan din a ni.