Chief Minister Lalduhoma chuan Thenzawl Peace City din tuma chak taka hmalak mek zel a ni tih a sawi.
Lalduhoma hian Ningani khan a bial chhunga Thenzawl Vengthlang Branch YMA kum 25-na (silver jubilee) lawmna a hmanpui a. Victoria English School-a inkhawma khuallian nia thu a sawinaah peace city hi a sawi chhuak.
“Thenzawl Peace City din tum a chak taka hmalak mek a ni a, hei hian nasa takin kan khaw hmelhmang a rawn thlak dawn a. Mipuite inhawng taka kan inbuatsaih a ngai dawn tih i hre lawk ang u,” tiin a chah.
Chief minister hian Thenzawl Vengthlang YMA member leh khawtlang mipuite jubilee chibai a buk a. Branch lo kaihruai tawhtute fakin vawiina hruaitute pawhin kum tam tak lo la kal leh tur tana hmathlir thui tak nei chunga kaihruai turin a chah.
Lalduhoma hian Mizorama Kristianna a luha zawlbuk a tawp zui dan leh a aiawh tura missionary-ten YMA an din thu a sawi a. “Kristianna pensan lovin Zo nun ze mawi vawn him leh thangtharte hnena hlan chhawn hna te, hnamzia leh culture venhim te, thu leh hla, lam, rimawi leh hmunhma hlui vawn him te a kalpui a, vawiina mite pawhin chu chu kan phak tawka kan kalpui ve zel a tul a. Thenzawl Vengthlang branch pawh hi hemi kawngah hian meichher chhi êngtu rawn ni thar ula, a ropui ngawt ang,” a ti.
‘YMA chu tanpui ngaite tanpuitu a ni’ tih chu Mizo mipuite thinlungah a cham reng a. “YMA chuan hmeithai leh fahrah te, chhuanchhamte lam hi i hawi tlat ang u,” a ti.
Thenzawm Vengthlang Branch hi kum 2000-a din a ni a, a hma chuan Bazar Branch hnuaia section pakhat a ni thin a. Tunah hian in ding 302 awmin an zinga 290 hi luah lai a ni a, mihring 1,450 an cheng a, an zinga 780 hi hmeichhia an ni a. YMA member 925 an awm mek.