Inrinni zanah Manchester United-in Old Trafford-ah Sunderland an mikhual a, Mason Mount leh Benjamin Sesko te goal hmangin si hnih faiin hnehna an chang a. Coach-in Altay Bayindir chawlhtirin, a goalkeeper thar Senne Lammens a khelhtir a, goal chhuah loin a inlan hmasak berah a khel, Ruben Amorim pawhin a a fak hle.
“A khelh hmasa ber atanga kan hmuh theih chu, a inringtawk em em a. A khelhpuite pawhin an pui nasa a, Senne khan a khel tha a, tihsual kan nei lo, kan vai khan tha takin kan khel,” a ti.
“Senne a lo luh khan, Altay kha kan la chhawr laklawh a, a tan league thar, ram thar a ni a, a insiam rem a ngaih avangin kan khelhtir vat lo va. Goalkeeper-te tan hian pressure a sang duh bik bawk nen, training dan thar a hmachhawn a, kan nghak deuh a ni. Thawhrim a mamawh a, kan club-a khel turin a inbuatsaih nasat a la ngai hle a ni,” tiin Amorim chuan Lammens chuangchang a sawi.
An game khelh danah Amorim a lawm hle. “Goal kan chhuah lo va, kan khel tha tawk lo va; mahse, chance hlauhawm tak tak erawh kan nei nual a. Kan inkhel pum pui thlir chuan player-ten an rilru an pe a, kan tlarhnung a tha a, second half-ah chuan kan chak dawn tih a lang chiang tawh a ni,” a ti.
Sunderland laka goal khungtu, Mount leh Sesko te pawh coach chuan a fak a. “Mason Mount hi wing leh forward-ah ai chuan midfield-ah tha a thawh hlawk thei tih a lang chiang a, player fing a ni a, defending lamah pawh a tangkai hle bawk a. Vawiin khan a inkhel hnem deuh a, player rilru paukhauh tak a ni a, thiam taka kan enkawl a ngai a ni,” a ti.
“Sesko pawhin goal a khung a, ball kan vawrh hnem chuan hma a sawn chho zel dawn a. A khelhpuite nen inkungkaihna tha an nei chho zel bawk a. Senne-a ball pet chhuah pawh khan dawng turin a lo insiam rem thei zel a, a khelh danah kan lawm tlang hle a, amah leh amah hi pressure a inpe hnem deuh a, chutih laiin thil tha tak erawh a ni e,” tiin Portuguese chuan an goal khungtute pahnih a fak.
Ram inkhelh chawlh a awm dawn a, Premier League-a an inkhelh leh hmasak berah Manchester United hian Anfield-ah Liverpool an tlawh dawn a ni.