Aizawl: West Phaileng MNF Unit Joint meeting, Kanan Branch YMA Information building, W. Phaileng-a Inrinnia buatsaih a hmanpuinaah MNF Sr. Vice President, Dampa bial by-Election MNF official candidate ni bawkm Dr. R. Lalthangliana chuan PWD minister-in Dampa bial mipuite vauah puhin, tha a tih loh thu a sawi.
Dr. R. Lalthangliana chuan ZPM-in kalphung thar tha zawk leh mipui sorkar siam tura an intiam nasat hle laiin, PWD Minister-in a campaign-naah Dampa bial mipui a vau a, bial hmasawnna tura hmachhawp mek Pukzing leh Silsuri inkar kawng NESID sum hmanga siamna tur chu ZPM candidate a tlin loh chuan ngaihtuah nawn leh a ngai ang tia a sawi chu, Dampa bial mipui hmuhsitna leh tham lohna, sorkar thuneihna hmanga mipui rahbehna lian tak a ni tih sawiin, hetiang hi democracy rama thil thleng atan thil tih chi loh tawp a ni a, mipui inchung tlaka invauna tawngkam hmang tawhlo turin ZPM sorkar a ngen.
Dr. R Lalthangliana chuan Minister meuhin hetiang thu a sawi hi tak tak a ni dawn em ni tia ngaihtuahna a neih laiin, a video hmuh tur a lo awm bawk si chu mak a tih hle thu a sawi bawk.