Aizawl: Mizoram Blind Society (MBS) chuan khawlaia rimawi hmanga zaia eizawng mitdelte chu ‘The Mizoram Prohibition of Beggary Bill, 2025’-in a khap dawn a nih chuan dan hi a taka Mizoram sorkarin a hman hmaa an eizawnna tur ngaihtuahsak hmasa phawt se an duh tih an sawi.
MBS chuan thuchhuah an siamah tun hnaia Mizoram State Legislative Assembly-in ‘The Mizoram Prohibition of Beggary Bill, 2025’ a pass chu ram leh khawpui hmasawnna tur atan thil tha tak ni mah se mitdel thenkhat, eizawnna mumal nei lo leh chhungte enkawltu mumal nei tawh lo te, Mizoram leilung fa dik tak ni bawk si, rimawi hmanga bazar leh khawlai hmun remchanga zaia eizawng thinte dinhmun ngun zawkin sorkarin ngaihtuahsak se an duh tih an sawi.
MBS-in a an hriatpui mitdel khawlaia zaia eizawng thinte hi mi pakua an awm tih an sawi a. Heng mite hi an nihna leh an dinhmun chiang takin an hriatpui avangin khawlaia rimawi hmanga zaia an eizawnna hi dan hian a khap dawn a nih chuan a taka sorkarin a hman hmaa eizawnna tur mumal ngaihtuahsak hmasa phawt se tha an tih thu an sawi.
Rawtna an neihte chu chief minister, social welfare minister leh director, social welfare, women & child development department-ah ziakin an thehlut tawh tih sawiin, sorkara an thlente hi tun dinhmuna sorkarin a tihlawhtling thei lo a nih chuan zaia eizawng thin an chhinchhiah mi pakuate hi danin huamtir lova sap ram thehkhata an tih dan angin street performer pakhat angin dah ni se, ID siamsak se tha an tih thu an sawi bawk.
He tih mek lai hian, hnam dang Mizorama kutdawh a kal mitdel leh rualbanlote chu an huam tel lo va, sorkar hian anmahni ram leh state-ah thawn let zel se an duh thu leh tuna mitdel thenkhat, Mizoram sorkar hnuaia PE leh contract basis-a thawk lai mekte nghehna remchang la nei ve thei lote chu sorkarin Backlog vacancy policy for Persons with Disabilities in Government Job recruitment hmanga an ngheh theih dan tur kawng zawnpui thei se an duh thu an sawi a ni.