Rajasthan-a Jaipur khawpuiah sorkar damdawi in, Sawai Man Singh (SMS) Hospital-ah Pathianni zan tlai tawh takah khan kangmei chhuakin damlo pariat vel an kang hlum.
Trauma centre in-charge Dr Anurag Dhakad chuan kudam atanga kangmei a chhuah tan lai hian Neuro ICU-ah damlo 11 an awm mek thu leh electric short circuit vanga kang a nih a rinawm tih a sawi.
Kangmei chhuak hian mi a tichiai hle a, a khu pawh a darh nasa a, hei hian damlo leh an chhungte a tichiai hle a ni.
Lehkha pawimawh tak tak, ICU hmanrua, thisen sample lakna tube leh kudama an thil dah eng emaw zat a kang chhia a ni.
Damdawi ina thawk leh damlo buaipuiten damlote hi an hruai chhuak a, an khum chawpa damdawi in pawna zawn chhuahte pawh an awm a. Kang thelhtute hrilh an nih hnuah an thleng thuai a, darkar hnih chhung velin an thelh mit thei.
A hmuna awm, ward boy pakhat, Vikas-a chuan thawktu dangte nen kangmei a nasat hmain damlo tam tak an chhanchhuak hman tih PTI a hrilh.
“Kangmei a chhuak tih kan hriat lai khan mi zaina hmuna kan awm lai a ni a, mi dangte pui turin kan tlan nghal vat a. Damlo pathum pali vel chu kan chhanchhuak hman a; mahse, in chhungah khan kang kha a lo nasat zui tak em avangin kan che zui thei ta lo va, kan theihtawp chu kan chhuah a ni,” a ti.
Police an thleng zui a; mahse, in chhungah khan meikhu a nasat em avangin an lut mai thei bik lo niin a sawi.
Fire team an thlen laiin ward pum chu khuin a vawh a. Kang thelhtute hian a ep lama tukverh tichhiain an lut a, an thelh tan thei ta chauh a ni.
Chief Minister Bhajanlal Sharma, Parliamentary Affairs Minister Jogaram Patel leh Minister of State for Home Jawahar Singh Bedham chuan trauma centre hi an tlawh nghal.
Patel leh Bedham te an thlen hian damlo awmpuitu thenkhat chuan thawktuten an tlanchhiatsan niin an lo hrilh a, damlote dinhmun pawh an hrilh lo niin an sawi bawk.
“Meikhu kan hmuh khan thawktu kan hrilh nghal a; mahse, an ngaihsak lo va. Kangmei a lo chhuah khan a tlanchhe hmasaah an tang a. Tunah pawh damlote dinhmun pawh kan hre lo va, an dinhmun hriat kan duh a, tumahin min hrilh si lo,” tiin pakhat chuan a sawi.
Chief minister a thleng zui a, doctor leh damlote pawh a kawm kual bawk.