Aizawl: Adviser to Chief Minister (Political) Lalmuanpuia Punte chuan ZPM sorkar chu Pathianin a hria a, a kaihruai a, eptu party-ten nasa takin bei mah se thil tha a ti mawlh mawlh reng tih a sawi a. Mizoramah incubation centre din a ni dawn tih a sawi.
ZPM party-in an party pisa-a Thawhtannia chhung inkhawmah Lalmuanpuia Punte, MLA chuan India hmarchhaka awmchhun tur leh skill development lama thalaite training-na tur course 15 zet awmna, airport leh rel kawng atanga hnai, incubation centre tur ram acre nga hmun sorkar laipuiin an duh avangin |uahzawlah din a ni dawn tih a sawi.
ZPM sorkar chu Pathianin malsawm tlakah a ngai tih a lang a, NDA-a mi pawimawh tak takte awmna state sorkar dangte aiin Mizoram duhsak a nih thu sawiin Hrangturzo bialtu MLA Lalmuanpuia Punte chuan, India tana sumdawnna kawngpui leh kawtchhuah ropui tak tur, Kaladan Multi-Modal Transit Transport Project a buaipui mek hi kum 2026-ah zawh fel tum a nih thu a sawi a. Rel a lo lut tawh a, Pathian malsawmna tam tak an dawn laiin hnam erawh a him a ngaih thu te, sorkar hnathawk aikal lak tihtawp a nih thu leh office tan hunah tanin ban hunah an ban tawh thu te, General Provident Fund (GPF) withdraw leh pension thlengin awlsam taka pek a ni zel te, sorkar hnathawkten a hunah hlawh an lak zel thu leh kut hnathawktute tan sawhthing an lei a, lakhuihthei thlengin an leisak tih sawiin, “He sorkar hi Pathianin a hria a, min kaihruai a, eptu-ten nasa taka min bei mah se, thil tha a ti mawlh mawlh reng a ni,” a ti.