Aizawl: Mizoram SSA Teachers Association (MSSTA)-in high court thupek anga CSS hnuaia thawk primary leh middle school zirtirtute dah nghet thuai turin Mizoram sorkar an phut.
Nimina thuchhuah an siamah MSSTA chuan Samagra hnuaia primary leh middle school zirtirtuten Mizoram sorkar hnuaiah an chanvo dik tak chang lo ni a an inhriat avangin September 19, 2019 khan sorkar chu Guwahati High Court, Aizawl Bench-ah khinna an theh lut a. March 17, 2023 khan court chuan thutlukna siamin SSA zirtirtute dah ngheh dan tur Right to Education Act (RTE) Rules zawm chungin point thum a siam a. Mizoram sorkar chu thla ruk chhunga point eng emaw ber hmanga SSA teacher dah nghet tura tih a nih thu an tar lang.
Beiseina sang tak nen an thlir laiin sorkar chuan thla ruk chhungin court thutlukna a tihlawhtling thei lo a. Sorkar atanga hmalakna tak tak a awm loh avangin, Sept 29, 2023 khan court zah lohna, comtempt of court thehluh leh a ni a. Kum hnih hnuah pawh hmalakna lian tham a awm lo mak an tih thu sawiin Mizoram sorkarin CSS Regularisation Scheme Gazetted chu June 18, 2024 khan tichhuakin he scheme hi SSA teacher-te court-in dah nghet tura a tih avanga siam leh sawi a nih mek laiin a scheme neitu leh a siam chhan tumah dah ngheh pawh an la awm loh laia health department hnuaia health worker 31 dah ngheh an ni ta chu vanduaithlak an tih thu an sawi a. Dan ngai pawimawh tak sorkar hian court thutlukna zahsaka a harsatna lai chiah thlirsak lo tur leh court judgement ang taka dah nghet thuai turin an phut tih an sawi.