Aizawl: Chief Minister chuan a tul dan azirin department hrang hranga thawktute chu indawr tawn zung zung thin tur leh an hnuaia thawktute uluk taka vila enpui thin turin a chah.
Thawhtanni khan chief minister hovin CM Conference Hall-ah Special Assistance to States for Capital Investment (SASCI) hnuaia department hrang hrang kaltlanga hmalakna kalpui dan thlir letin an thukhawm.
Thutkhawmah hian chief minister chuan SASCI chu department hrang hrang kaltlanga hmasawnna hna thawhna tur a nih angin hmalaknate a hun taka zawh fel thin a nih theih nan ngaih pawimawh a tul thu a sawi a. Department thenkhata thawktute inthlahdahnain hna tha taka thawktu department dangte a tihkhawtlai phah theih avangin thawktute inthlahdah lo turin a chah.
SASCI hnuaia hnate tha taka thawhin a kum leh a ruahmanna kalpui dan tur nasa taka a hril lawk avangin, department hotute chu a hun taka hna zo fel hman turin a chah a. A tul dan azirin department hrang hranga thawktute pawh indawr tawn zung zung thin tur leh an hnuaia thawktute uluk taka vila enpui thin turin a chah bawk.
Thutkhawmah hian Home Minister K.Sapdanga, PWD Minister Vanlalhlana, EF&CC Minister Lalthansanga, Agriculture & Farmers Welfare Minister PC Vanlalruata, Health & Family Welfare Minister Lalrinpuii, Power & Electricity Department Minister F. Rodingliana, Sports Minister Lalnghinglova Hmar leh Adviser to Chief Minister (Finance & Planning) TBC Lalvenchhunga te an tel a. SASCI hnuaia hmalakna kalpuitu department hotute pawh an tel.
He hunah hian Finance Secretary Ramchuana chuan kum 2020 -25 chhunga SASCI hnuaia project hrang hrang dinhmun a sawi fiah a. Kum 2024-25 chhunga project kal lai, Expenditure Sanction la awm lo, project 13 dinhmun thlir let a nih bakah PWD hnuaia Working Women Hostel sak hna chak zawka bawhzui dan tur leh PM Ekta Mall (Unity Mall) sak hna sawt zawka kalpui dan turte an sawi ho bawk.