Aizawl: Commerce & Industries Minister F Rodingliana chuan industry din tak tak duh thalaite tan hmun siamsak an tum tih sawiin, sorkar policy nen tangkawpin hma an la dawn tih a sawi.
Commerce & Industries Department buatsaih, ‘The Industrial & Investment Policy of Mizoram, 2025’ leh ‘The Mizoram Procurement Preference Policy for MSEs, 2025’ chu Thawhlehni khan Minister F Rodingliana’n Vana Pa Hall-ah a tlangzarh a. Tlangzarh inkhawmah Mizorama industry dinna leh tihchangtlun zawkna tura policy tha tak duan a ni leh a vawi khatna atan investment policy siam a ni chu lawmawm a tih thu a sawi.
F Rodingliana chuan ram din chhuah nan industry a pawimawh tih sawiin, Mizorama thil siam leh thar chhuah ngei mipuiin an ngaihhlut a ngaih thu a sawi a. “Tunlai khawvel thang meka industry dinna tura power mamawhna sang zel leh a tul anga hmun zau zawkte siam a nih theih nan policy thar hi duan a ni,” a ti a. Khawvel hmun danga industrialist-ten ngaihsan leh ngaihhlut an hlawh anga Mizo industrialist-te pawhin hmasawnna duhawm tak an neih theihna tur te, thangthar lo awm zel turte tan pawha eizawnna ngialnghet siamtu leh kawng sialtu pawimawh tak a ni dawn tih a sawi a. He policy tihlawhtling tur hian department hrang hrangte thawhhona, inpekna leh inlawm tawnna a pawimawh thu a sawi bawk.
Policy tlangzarh takte hi industry neituten tangkai zawka an hman theuhna turin an tlangzarh tih sawiin, “Hei hi ZPM sorkarin policy-a kan neih tawh angin tihhlawhtlin a ni ta a ni a. |halai industry din tak tak duhte tan hmun siamsak kan tum a, kan sorkar policy nen tangkawpin hma kan la dawn a ni,” a ti.
Tlangzarh inkhawmah hian Dr. K.C. Lalmalsawmzauva, Adviser to CM (Implementation of Hand-holding Policy) & Vice Chairman, Mizoram State Policy Coordination Committee ni bawk chu khualzahawm a ni.