Roger Federer chu International Tennis Hall of Fame 2026 a lak luh tura chhawp chhuah zinga langsar ber a ni.
Grand Slam maltana vawi 20 champion thei hmasa ber, Federer hian Rafael Nadal leh Novak Djokovic te nen tennis khawvel an chiah hneh hle a, record pawh an siam hnem hle.
Federer hi a forehand tha em em mai, service tha bawk si, tennis court chhunga sawisel tur tam lo tak mai leh footwork tha tia sawi thin niin, a vanglaiin maltanah vawi 1,251 a inlan a, nomawi 103 a la hman a. Open era bikah chuan Jimmy Connors chiah tluk loh a nei a ni.
Season nga chhung ATP No. 1 a ni thei a, dinhmun sang ber hi a zawnin chawlhkar 237 zet a luah thei a. Switzerland chu 2014 Davis Cup a lakpui a, 2008 Beijing Olympics-ah khan Stan Wawrinka nen inkawpin doubles-ah gold medal an la a ni.
A vanglai takin Federer hian 2005-2007 chhung khan a zawnin Grand Slam maltanah final vawi 10 a lut a, heng zinga vawi riatah hian a chak thei a ni.
Kum 2010 thleng khan tournament liana vawi 19 a telah vawi 18 zet final a lut thei a. Quarter final vawi 36 a lut zawn a, semi final pawh a zawnin vawi 23 zet a lut bawk.
Tennis ambassador niin Federer hian English, French leh Swiss German te a thiam nal hle a. Kum 2021 Wimbledon kha pangngai taka a inkhelh hnuhnun ber niin, Nadal nen Laver Cup doubles-ah an tang dun a, he mi hnuah hian tennis khelh a chawlhsan a ni.
Hall of Fame-a lak luh tur zingah hian Federer bakah Svetlana Kuznetsova pawh a tel a. 2009 US Open champion Juan Martin del Potro bakah TV announcer Mary Carillo leh administrator Marshall Happer te pawh an tel a, November thla hian lak luh an ni ang.
Grand Slam mipa maltan inelnaa champion kim thei vek mi pariat zingah Federer hi a tel a, Wimbledon-ah vawi riat champion-in Australian Open nomawi vawi ruk a la a, US Open-ah vawi nga a champion bakah French Open-ah vawi khat a champion bawk.
Nomawi lian a lak hmasak ber chu Wimbledon 2003 niin a lak kimna tak chu Roland-Garros 2009 kha a ni.
Grand Slam title 20 laa record a siam chu a hnuah Nadal chuan a khum a, nomawi 22 a la a, hei hi Djokovic chuan khum ve leh chhawngin ani hian vawi 24 a la thei a ni.