Aizawl: Mizoram Tourism department leh sorkar laipuia Ministry of Tourism tangkawpin tourism-in hma a sawn theihna tura inrawnkhawmna, zirhona leh indawrtawnna hun atana a buatsaih, ni thum chhung awh tur Mizoram Travel Fest 2025 chu Nilaini khan Tourism Minister Lalnghinglova Hmar-in a hawng.
Aijal Club-a hawnna inkhawmah Toursim Minister Lalnghinglova Hmar chuan kum reilote chhunga Mizoramah khualzin zat nasa taka a pun thu sawiin, Sairang thleng rel lu lo lut avangin an pun belh zel pawh a rinawm thu a sawi a. Chumi avang chuan Mizoram chhunga mi ten khualzin lo dawnsawn dan kawnga an inpuahchah that a pawimawh thu a sawi.
Tourism Minister chuan Mizoram tlawhtu khualzin zat thang chak hle mah se, state dangte nen khaikhin chuan a la tlem thu a sawi a. Khualzin hipna nipahfawma kut leh thildang hrang hrang an buatsaih thin chu kum tina hun nghet nei a, ‘tourism calendar’ siam tha a tih thu a sawi a. Anthurium Festival pawh nakkum 2026 atang chuan kum tin hun nghet ruatin Reiek-ah buatsaih ziah tum a nih thu a sawi bawk.
Dr. Pankaj Kumar, Associate Professor, Mizoram University pawhin Mizoramin tourism lama hma a sawn theihna tura khawtlang thuamthat pawimawhna leh hmalak theih dan tur te a sawi a ni.
Travel Fest hawnna inkhawm neih zawh hian Aijal Club Park ah YWCA nen tangkawpa buatsaih, Mizo chaw ei insiamsiak ‘Mizo Thali Cooking Competition’ neih chhunzawm a ni.
Vawiin hian Chief Minister Lalduhoma hovin, ‘Revitalizing Mizoram’s Tourism: Sustainable Growth Through Community Partnerships’ tih thupui zirho a nih dawn bakah, Stakeholders discussion leh Tourist Service Provider te tan B2B session buatsaih a ni bawk ang. A ni thum ni chu investor te nen a inkawmna hun atana ruahman a ni.