Khuh damdawi him lo ei vanga naupang thi chu 24 an tling ta a, Chhindwara district, Madhya Pradesh-ah naupang pahnih chu an thenawm, Maharashtra-a Nagpur-a enkawl an nih laiin an thi leh niin Nilaini khan thuneituin a sawi.
Naupang thite hi kum kaw mi leh kum thum mi an ni tih Chhindwara Additional Collector Dhirendra Singh-a’n a sawi.
Naupangte hi Parasia leh Kakai Bohana khua, Chhindwara-a cheng niin a sawi a. Kum kaw mi zawk hi Nagpur damdawi ina enkawl a nih laiin Pathianni khan a thi a, a naupang zawk hi Thawhlehni khan a thi thung.
“Kum thum mi hi September 14 khan dinhmun tha lo takin New Health City Hospital, Nagpur-ah dah a ni a, a dinhmun hi a kang thei lo va, Thawhlehni zan khan a thi a ni,” tiin Singh-a chuan sawiin thi zat hi 24 an tling ta a, naupang dang pahnih enkawl lai an la awm bawk tih a sawi.
Khuh damdawi him lo, Coldrif an ei avanga thi naupang 24 zinga a tam ber hi kum nga hnuai lam niin an kal a chhia nia hriat an ni a. Rajasthan-a district hrang hrangah naupang pathum vel an thi bawk.
Khuh damdawi chi thum – Coldrif, Respifresh TR leh ReLife chu World Health Organisation (WHO) chuan a ‘him chin ni phak lo’ tiin a puang tawh.
October 2 khan Tamil Nadu-a drugs control director chuan Coldrif sample an lakte chu a him lo tih an hmu tih a sawi a. A hnu ni thumah Madhya Pradesh-ah Coldrif-ah hian diethylene glycol 48.6% a tel a, a him chin chu 0.1% chauh a nih laiin a pel thui hle tih a puang bawk.
Madhya Pradesh Police chuan Chhindwara-a Dr Praveen Soni chu a fimkhur loh avangin an man tawh.
Naupang thihna a thlen hnuah damdawi hi Tamil Nadu, Madhya Pradesh, Kerala, Karnataka, Punjab, Himachal Pradesh, Uttar Pradesh, Puducherry, West Bengal leh Delhi-ah hman khap nghal a ni.
Madhya Pradesh Police-a special investigation team (SIT) chuan damdawi siamtu, Tamil Nadu-a Sresan Pharma Company neitu, G Ranganathan chu October 9 khan an man tawh bawk.
Tamil Nadu sorkar chuan Thawhtanni khan company license hi hlihsakin an company a khar nghal bawk.