Rafael Nadal chuan tennis khelh a chawlhsan hnuah a khelh thin infiamna chu a ngai lem lo tih a sawi.
Kum 38 mi, Spanish tennis player hlui, Nadal hian a vanglaiin Grand Slam nomawi 22 lain heng zinga 14 hi Roland Garros-ah a ni a. Nikum November thla khan Malaga-ah Davis Cup a khel a, kha mi hnuah khan tennis khelh a chawlhsan zui ta a ni.
Nadal chuan Madrid khawpuia Laureus World Sports Awards an semnaah ‘Sporting Icon’ chawimawina a dawng a, hetah hian tennis khelh chu a ngaih zui loh thu a sawi chhuak.
“A nihna takah chuan tennis khelh ka chawlhsan hnuah hian ka ngai zui miah lo. Ka ngaih zui loh chhan hi tennis ka nin vang emaw, tennis ka do vang emaw a ni lo. Lungawi leh lawm takin ka vanglai ka hmang zo a, la tlin ila chu ka la inkhel zui zel ang a, ka chawlh hma kha chuan nuam ka ti a ni,” tiin a sawi.
“Tennis khelh aia nuam tih kha ka nei ngai lo va, taksain a tlin tawh loh chinah chuan chawlh bak tih theih a awm tawh lo va, kei pawhin chawlh ka puang ta a ni,” a ti.
A vanglaiin Nadal kha a inhliam fo a, chuti chung chuan chawlh mai kha a tum bik lo a, a inkhel leh zel thin a ni.
“Chawlh kha puang lo ila, harsa ti takin ka la inkhelh chhunzawm zel ang a, a theih anga rei inkhelh kha a tul ber tawh lem lo a. Thutlukna ka siam dawn khan harsa ka ti khawp mai a, hun pawh ka hmang rei ta reng a. Ka taksain a zo ta lo viau nia ka hriat hnuah kha chuan chawlh puan ngei kha ka tum nghet ta a ni,” tiin a sawi a ni.