Aizawl: All NGO Mamit leh Mamit District Commercial Vehicle Owners Association-in an ruahman lawk angin Ningani zing dar 7 atang khan Mamit district chhung kawngpui pawimawh hmun hnihah an dang.
Kawngpui hi Mamit khaw tawntirh highway leh Mamit Hmar lam Sericulture Complex bulah an dang.
Thawhtan zana All NGO Mamit leh Mamit District Commercial Vehicle Association Joint Meeting chuan, Mamit district chak lakna leh veivahna kawngpui pawimawh Mamit atanga Aizawl, Mamit atanga Bairabi leh Mamit atanga Zawlnuam inkar kawngpui lirthei eng chi tan pawh kal hleih theih loh khawpa a chhia chu a rang thei ang bera siam tura Mizoram sorkar an ngenna chu October ni 4-12, 2025 chhung an ngaichang chunga, hmalakna mumal leh an beisei anga hnathawh a awm loh avangin Ningani atanga Mamit panna kawngpui hi tiamchin awm lova dan an rel a ni.
Kawngpui dan an tum chungchang hi Nilaini zan khan Mamit DC Conference Hall-ah Mamit DC, K. Laltlawmlova kaihhruaiin PWD hotute nen an sawi ho a. An inkawmnaah hian PWD E-in-C H. Zoramliana chuan kawngpui siam thatna tur sum awm lo chungin fund dang atanga ngaihtuah a, a theih anga lo thawk nghal tur leh khawlte pawh ngaihtuahpui nghal turin a ngen.
Hetih lai hian, All NGO Mamit leh Mamit District Commercial Vehicle Owners Association chuan a ba tur ringawt chuan khawl pawh hman tur a awm loh thu an sawi ve thung a, hemi avang hian Mamit leh Aizawl, Mamit leh Zawlnuam, Mamit leh Bairabi inkarah khawl tam zawk, hnathawktu tam zawk leh lung tam zawk dah turin an phut a ni.
Thawktu tam zawk leh khawl tam zawk hi vawiin atanga chawlhkar thar Thawhtanni thlenga an dahlo a nih chuan total band thleng a kalpui an tum thu an sawi bawk.
Ningani khan MJA Mamit District chuan kawng danna hmun hi tlawhin, kawngpui an siam mek vawk thlanmual bul hi commercial vehicle Association hruaitute nen an en hova, kawngpui siam mekte duh khawp loh lai an neihte an sawiho nghal a ni.