- K. Hmingthankaia
Ruling party leh Ministry hian social media chauh hi thu taka ngaiin, platform hrang hrang atanga react nghal zel bik ringawt lo hian, Chanchinbua mi thahnemngaite thu ziahte hi bengkhawn ve sela, thu tak hla takah ngaihsak ve thin sela, an ngaihtuahna seng ve thin sela, ram leh hnam tan bakah, anmahni tan ngei a tha tur hi a nia.
Kan sawi thin kan sawi nawn leh ang. Kan ramah chuan mipuiin sawrkar lai kan tehna lian ber chu KAWNG hi a la ni zel. Party leh politic-a inchirthehna leh insawichhiatna hrang hrang chu awm thin bawk mah se, sawrkar lai duhkhawp lohna leh sawrkar thar siam min chaktirtu lian ber chu kawng hi a la ni chiang bal zel. Thil hrang hrang baka mipui rilru na taka hliam thintu ber chu KAWNG a la ni zel. Sawrkar thar lo pian apianga mipui rilrua thil beiseina lian tak lo lang hmasa ber thin chu, ‘kawng tha kan nei thei tawh ang chu’ tih a la ni zel.
Term khat chhungin thil hrang hranga sawrkar lai demna leh fakna awm bawk thin mah sela, kawng chhiat laia mipui rilru na hi a nat em thin avangin, chu chu zawi zawia a thang lian zelin, nitin mipui rilruah sawrkar lai ngaihzawn lohna a lo lian hret hreta, inthlan leh hunah thu tlukna an siam phah thin a ni.
Chuvangin, kan ramah chuan mipui ngainat rawn sawrkar siam duh chuan kumtluana kawng lama insawrbinga, kawng hi atchilh bur lian bera neih tlat mai tur a ni.
Eng anga thil tha leh ropui, thil lian tak tak nia hriatte pawh sawi fo leh buaipuiin, han ti vel bawk thin mah sela, kawng ber a chhiat lutuk si chuan sawrkar thil tha tih zawng zawng chu a hliahkhuh leh vek tho thina, mipuiin sawrkar kan dem leh tho thin. Eng ang pawhin sawrkar lai chu sawi chhe viau mah sela, khawimaw lai kawng langsar taka an that mam pur tawh hi chuan mipui hi kan hlim surh vek thina, sawrkar lai chungah kan lawm ru hle thin a nih hi. Mahse, kan kawngte hi a tha rei thei lo thin ema, a tha lai hi a tlem thin em bawk sia, sawrkar lai chunga kan lawmna hi a rei thin lova, kan lawmna lai hi a tlem thin em a nih hi. Chuvangin, kumtluana kawng atchilh bur leh kawng lamah theih tawp an chhuah reng a ni tih hmuh tur awm sawrkar siam nachang hria an awm hunah kan thlang nawn reng tawh mai ang.
Mi ram angin kan ramah kawng a tha thei tak tak lova, a tha rei thei hek lo tih hi mipuiin kan hria. Chuvangin, kan ram thleng leh leilungin a zir miau loh avangin mi ram kawng ang neih kher kan beisei pha lo, mi ram ang kan nih loh avang tak erawh chuan kan sawrkar hian kumtluanin kawng hi ngaihven sela, thahnem ngai taka chawl lova bei reng turin kan beisei a ni. Mahse, kan sawrkarte chuan, tuna ZPM sawrkar ngei pawh hian kawng chu an ngai pawimawh lo ni mai lovin, an ngaihthah lui tlata, mipui manganna leh rilru kap tlattu chuan an rilru a kap ve miah lova, an theih tawp an chhuah lo tih chu sawi nawn a ngai lo. Tun kum hnih chhung hian kan mit leh bengin a hre chiang ta. Mipui manganna leh thinurnain a vawr tawp a thleng ta maw tihah chauh an han ti hluaia, theih tawp chhuahin kawngah chauh chuan an inpe dawn emaw tiin kan lo thlira, a hming mai maiin reilote an thawm ri hluaia, engmah chetna liantham hmuh zui tur a awm leh ngai si lo. Beisei taka kan thlan ZPM pawh kum hnih an pumhlum dawn meuh chuan bei a dawng leh tan dawn ta der mai.
A mawhphurtu ni ve ta ila chuan, heti khawpa kan ram kawng pawimawh zawng zawng chhe lutuk vanga mipui manganna karah hian, tui taka muthilh har ka ti anga, platform hrang hranga nalh tak leh thawveng taka inlan zut leh, thu ropui leh mawi tak tak awlsam taka sawi fo hi ka ngam lo ang.
Kan kawng pawimawh tam zawk hi kan ram sawrkar enkawl loh, sawrkar laipui Ministry of Road Transport and Highway ( MORTH) hnuaia National Highway Infrastructure Developement Corporation Limited (NHIDCL) enkawl a ni tih kan hre theuh. Mahse, kan ram kawng pawimawh ber ber, kan nunna hnar enkawltute hian suahsual chhuaha min enkawl that sak duh miau loha, kan ngam bawk si loh chuan, a ram neitu, a ram leh a mipuite thatna tura inpe sawrkar chuan chhuanlam siam siam kual lovin, nu leh pa a nihna mawhphurhna chu tlin taka lain, a mite tan chuan theihtawp a chhuah mai tur a ni. A mite manganna sut kian chu sawrkar awm chhan leh kan thlan chhan, a mawhphurhna a ni.
Kan huan mawng hi tuten emaw rawn tikang ta ang sela, a rawn kan chho zel chuan kan huan pum leh kan in thlengin a kang chhe vek dawn tih hre reng leh hmu reng chunga thelh duh miah lova, ka mawhphurhna a ni lo, a tikangtute thelh tur alawm, ka thelh tur a ni hlei nem tih tlat ang vel a ni. A tikangtute chu tupawh ni ang hmiang, a kan tawh miauva, kan chhungkuain kan tawrha, kan chhiat vek dawn ai chuan, a mawhphurtu zawn zawn leh inpuh kual kawi khawmuang lova, kan theihtawpa thelhmit turin hmanhmawh takin kan bei mai dawn lovem ni? Tih theih dang kan nei tawh lo a nih hi.
Kan ram manganna lian ber kawng chungchanga heti taka kan thinur chung pawha, a enkawltu ber NHIDCL-ten engah mah min ngai lova, suahsual chhuaha an luhlul luih tlat chhan hi enge ni ang tih ka ngaihtuah thina, tun dinhmuna ka rindan lian tak chu hei hi a ni. Kan rilru zawng zawng luahtu, kan vaia manganna chu hmu fuh kiauvin, thiam takin Central sawrkar BJP hian kawng hi min tawktarhah a hmang a ni mai lo maw? Central sawrkar leh NHIDCL-te hian tawngkam tha tak min hmuh reng chung hian, a takin engmah thahnem min ngaihpui duh tlat loh hi. An duh phawt chuan kan hatsatna hi an tikiang thei tih an hre reng sia. Heti lam hawi deuha thu sawite pawh an lo awm tawh thin lo maw?
Chutiangte a lo nih phei chuan, kumtluana kawng tha neihna tur a nih dawn phawt chuan BJP emaw, Central-a sawrkar apiang emaw chu hetah pawh kan laltir zel mai dawn em ni ang? Chuti em a nih loh pawhin, BJP emaw, Central-a sawrkar apiang chu thiam takin kan lungrualpui zel mai dawn em ni ang? Nge ni, BJP emaw, Centrala tu sawrkar pawh thurualpui ai chuan, rethei hreawma thih thak pawh ka duh zawk, kan ti leh mai dawn em ni ang?
A thuhrimah ram tereuhtea mihring tlemte, rethei leh thawchhuah nei bawk si lo, Central service-a tling ve thei bawk si lo lehnghal hian, engatinge kawng engkima min enkawltu leh an tel lova engmah tih theih nei bawk si lo chung hian, helai ram kil tawp tereuhte atang hian kan lo intih Rotekawla sepa vela, Central sawrkar apiang kan hlauhva kan huat rikngawt zel? Kan ramin chak zawk leh awlsam zawka hma a sawn theih nan leh, hna thawh a awlsam thheih nana Central be thiam leh tlawn thiam apiang lah chu, engatinge Mizo hnam phatsantuah kan inpuha, kan inchirhtheh zel mai le? Engatinge Central sawrkar apiang do, huat leh hlauh hi kan inzirtir zel le? Engmah thawhchhuah nei si lovin nu leh pa thlazar hnuaiah, nu leh pa inpui hnuaiah indang ve ringawt ila, mahse, chhan tha tak pawh awm chuang si lovin kan nu leh pate chu do tlat si ila, nupuiin emaw, pasalin emaw nu leh pa chu haw tlat turin infuih reng ta sela, nu leh pa be tha zawk apiang leh thil dil thiam apiang leh, nu leh paten an lawm zawk apiang chu inhauh nan hmang ta zel ila, hmasawn a har duh awm. Chuti ang deuh chu kan ni mai lo maw? Kan la hniam em avang zawka Central sawrkarin min dimdawih avang hian, min ngai ropuiin min dah chungnung ta viau emaw kan intiin, er tham leh engto viau thamah min ngai tlatin kan inhria a ni lo maw? He India ram zaupui leh mihring tam lutuk karah hian, FCAA te hi keini uihum zat lek beih nan leh tihchhiat tum nan, keimahni tinzawn liau liauva siam emaw kan lo ti a ni lo maw?
Aw le, heng thu atangte hian mahni theuhin ngaihdan siam ila. Ngaihdan thlak ngai kan neih chuan thlak tum bawk ila. Tun kan sawrkar ZPM pawh hian insiam that ngai lai an nei a nih chuan, hun tha an la neih lai hian insiam tha se la. Thil ropui leh lian tak tak, thil changkang leh sang tak tak insawi khum leh in-show khum reng thin mah ila, kal velna tur kawng ber kan neih miau loh chuan chung thil zawng zawng chuan hlutna a nei lo tih hriain, sang taka min thlawhsansan lovin, hniam tak, kephah hnuai lei chunga kawng hi an theihna zawng zawngin ngaihven tawh se la, tichuan, thil lian leh ropui, hmasawnna leh changkanna changkang leh mawite chu famkim takin a lo thleng zel tawh mai ang. Kawng changtu Minister chauh mawhpuh lovin, Ministry pumpui mawhphurhna leh hmel lanna a ni.
Chutiang ni lova, a hmaa mite ang bawka lal nuam tia in lal chhunga in at leh viau zel chuan, tlanchhiatna tur midang an rawn lan mai bawk si loh chuan, a hmaa mite duh tawh bawk si lo, nangni duh tawh bawk si lo hian, mipui rilru na beidawng tawpkhawk hian ram hmangaihna leh thahnem ngaihna nei tawh lovin, mipui rilru in tih khawlohsakte chuan a theih dan dana enge maw zawng tala mahni hlawkna awm ve theihna tur nia kan hriat apiang lam chu kan hawi tawh mai dawn a ni. Kan ram hi a pherh nuai tawh anga, Ram tichhetu chu nangmahni, politician intite ngei hi in ni ang.
Tumah hi kan insiam tha duh lo a nih chuan, inthlan eng pawh lo awm apiang result atangin a lang chho zel ang. Tumah kan insiam tha duh lo a nih chuan, inthlan leh huna ka la dam ve te a nih chuan, kei ngei pawh hian, kan ram politic chhe lutuk runluih nan hrim hrim, dahkham chawi leh tlin loh huamin ka la chuh ve hial duh mahna.
Engpawh nise, a la tlai chhiat hma, hun kan la neih lai hian kan vai hian rilru thar puin, keimahni leh kan ram tan rilru fim leh rilru hrisel tak puin tan i la thar leh ang u hmiang.