Mizorama pawl lian ber YMA khawmpui Sakawrdaia neih zawh tak chuan an kumpuan atan Ruihhlo do an puang ta rup mai a, YMA hian kumpuan atan ram leh hnam humhalh hi kum tam tak an puang tawh a. Ram humhalhna lamah pawh mizote kan beng a var tawh hle a ni.
YMA in kumpuan thupui an hman hi Mizoram chhung hmun tinah branch ten an bawhzui thin a, kumpuan a YMA in a hman hi a tlangpuiin ram in a mamawh a ni thin. Zirchianna rei tak Central YMA leh branch ten an neih hnua kumpuan tura chhawpchhuah a ni thin a ni.
Kumin a ruihhlo do thupuia an han neih pawh hi thil tih loh theih loh anga lang a ni tawh a. Kan ram chu kiltinah ruihhlo in min run a, khawpui ber Aizawl atanga khaw chengker ber thlengin kan thalaite ruihhlo bawihah an lut a, an thi ruih ruih nitin a ni ringawt mai a, a manganthlak tak zet tawh a ni. Ruihhlo do in kan sawrkar chuan theih tawp chhuah reng mahse sawrkar tha ringawt chuan a hneh lo tih a lang chiang em em a, hetiang a nih avang hian pawl chak leh lian ber YMA in hma a han la tur hi a lawmawm tak zet a, YMA branch zawng zawng hian anmahni area tinah hmalakna tur an nei sa vek bawk. Khawdang melh ngai hauh lova penchhuahna tur an nei nghal vek a ni.
Hetih rual hian pawl chak leh lian ber pawh hi mipui thlawpna lo chuan a che thei lova, mipui thlawpna an mamawh em em dawn. Mahni theihna mualah theuh mitin kan chet a, kan thinlung kan pek a ngai dawn. Mi hrang hrangin theihna chin kan nei vek. A thenin sum lamah kan pui thei ang a, a thenin mahni tha in kan pui thei ang. A thenin kan hriatna hmang tangkaiin kan pui thei a ni. Chutih rualin kohhran lam pawhin tawngtaina in kan YMA hi kan thlawp ang a, he ram ruihhlo laka tluchhe mek hi kan chhanchhuak ngei ang tih i beisei ila, Lalpa zawnchhuah ram hi ruihhlo eichhiat mai tur laka chhan turin theih tawp i chhuah vek ang u.