- Dr. C. Lalrampana
Mizoram PWD emaw, BRTF emaw, NHIDCL kuta awm a ni emaw pawh ni se, englai mai pawha Mizorama kawngpui tha thei ta rêng rêng lo mai hi thil mak tawp thang niin a lang. Hetiang a nih chuan khawvel tawp indopui pathumna zawh vek thleng pawhin kawngpui tha zawh tur kan nei dawn lo tihna a ni. Kawngpui chhiat hma chhana chhuanlam tlangpui nia langte chu:
1 Ruah tui a tam lutuk;
- Kan leilung a nêm lutuk;
- Lungchang tha hman a ni lo;
- Alkatra an ren lutuk;
- Road roller-in an rapmuk tha tawk lo;
6 Alkatra an chhuang hmin lutuk etc
Khiti zat chhuanlam zingah khian a mal mala lak bing chuan a engamah khi chhuanlam tling a awm lo, a zavaia a that rualkhai a ngai zawk. Tin, ruahtui tam chhuanlam phei khi chu a dik ber lovang, kum khatah Mizoram hian 1900-3000 mm chauh ruahtui a dawng. Meghalaya ruahtui tlak tamna ber Mawsynram phei chuan kum khatah ruahtui 11,871mm a dawng a, heti êm êmin an buai ve chuang lo. Lung pawh a chang hman tlak tawk chu kan nei ve tho. Alkatra chungchang pawh chuti tehchiama chhuanlam tur a awm lo. Heng ai hi chuan a siam dan thar (new method) zawk hi kawng chhiat reng chhan zawk chu a ni.
Mizoram Chief Minister Pu Lalduhawma chuan Sept. 23, 2025 khan NHIDCL official-te nen review meeting an nei a, national highway leh project kalpui mek dinhmun chungchang an sawiho va. Kawngpui dinhmun chhe tak, contractor liability hun chhunga a hun taka siamthat ngaite leh, he biala ruahsur nasa tak avanga rigid pavement technology hman tura rawtnate a tel a ni. Meeting-ah hian kohhran pakhat tlakchhiatna tawhte leh Old Town Road-te chu state-a public works department-a hlan a nih thu an sawi bawk. Meeting atanga hriat tur pawimawhte chu Kawngpui tha lo; A hun taka siamthat ngai; Rigid Pavement Technology hman rawtna etc. Chief Minister chuan ram pum huapa highway tam takah khuar leh lei chung langa chhiatna nasa tak a thlen avangin a lungawi loh thu a sawi. A hun taka kawngpui siamthat ngai, Contractor liability hun chhunga siamthatna dik leh a hun taka siamthat a pawimawhzia a sawi bawk. CM hian ruahsur nasa leh monsoon rei tak karah kawngpui chhe thei lo tura rigid pavement (cement concrete) technology hman a rawt a. Road Hand over pawh CM chuan Old Town Roads chu bypass thar siam a nih veleh state PWD hnenah formal-a hlan turin a ngen a ni. CM chuan Aizawl–Vairengte Highway hi Mizoram-a “lifeline” a nih thu leh ngaih pawimawh ber tur a nih thu a sawi uar hle. NHIDCL-in a thutiam: Mizoram-a Regional Executive Director, Adelbert Susngi chuan harsatna sawiho zawng zawng chu zawm nghal vek a nih tur thu a tiam.
Engang pawhin NHIDCL hian thu tiam mah se, a takin engmah a zawmleh chuang lovang. Heti khawp hian Zoram mipuiin kan nawr tawh thin, an insawi ang leh intiam angin an awmleh ngai chuang lo. Ministry hrang hrang kal tawhte leh tuna Ministry kal mekte’n Zoram mipui vote tlin duh vanga an tih loh tur an tiam duah thin ang tho an ni a, Chakai nufa kal inzirtir ang chauh an nih hmel hle.
A pawimawh ber zawk chu engkim hi a taka a tiha tih hi a ni. Tin, NHIDCL-in phairam lei nghet muk thasa leh upa tawh tak taka kawngpui an siam dan method an hmang tlat hi kan kawngpui chhiat reng chhan zawk dik tak chu a ni. PWD & BRTF-in method hlui an hman laia kawngpuite kha tha tak tak hmuh tur a la awm. Kum 44 liam ta, 1981-’82 lai vela BRTF-in Aizawl-Tipaimukh kawng an siamte khi tun thlengin kawngpui tha pawl a la ni.
New method hmangin NHIDCL hian kan kawngpui thasa lung lian leh a te chawhpawlha muk taka rah bel hnu an nawr khawk vek a, thuk tawkah vawk chaw pekna kuang angin an nawr khuar a, tuluankawr siam mumal bawk si lovin alkatra an luan hnana, lirthei an han tlan a, a nem lai apiangah khi a awm a, ruahtui lutin kawngpui a hawrh chhe zung zung a, tiau lailung an hman lah a mam avangin inmanghet tur awm chuang hek lo; lei tak nena inchawhpawlh chu a diak kawi zeihzui a, vawkchaw thlênga hnapkhawn, dawl leh bawrhsaibe bai pawlh kawi nâl ang maiin a kuang tawn tawnah chirh nâl kawi vel zei zui vangin lirthei an let pheng phung mai thin a, nisensa hnuaiah lo chuan han siamleh thin pawh ni se, leitha hlang a nih tawh avangin a khuar thuk tual tual a, lirthei tlan chhuak zo thin lovin an tang khawm ta teuh thin a ni. NH 06/306-ah ngat phei chuan lirthei tangkhang leh lirthei chhia a tam tawh bakah mihring nunna hial chan pawh an awm ta. Kan nunna hnukpui lamtluang ber hi a van rapthlak ta êm!
Kan CM-in rigid pavement (cement concrete) hmanga kawngpui siam a rawt hi a finthlak hle. Mizoram khawilai hmunah mah hian NHIDCL kawngpui siam mek dan “New method’ hi chu hmang tawh miah lo se, kawngpui thasa tihchhiat belhchhahna hmanraw tha ber a nih avangin Mipui hian hnãwl ngam ila, Sawrkar hian Ministry Of Road Transport-ah Mizoram tan chuan rigid pavement leh Old method chauh kha hmang turin na takin nawr bawk se… state thenkhat national pension scheme hmang zet tawh, a that loh zawk avanga Old Pension Scheme-a an kirleh ang hian kan tihdan pangngaiah khan kirlehin rigid pavement hmang bawkin tuiluankawr felfai tak siam tel zel bawk se, kawngpui chhiat reng chhan hi a tawp thei chauh dawn niin a lang.