- K. Hmingthankaia
ZPM Sawrkar lang tlang tak chuan, a hnathawkte zingah leh mipui zingah mi rinawm lo, rilru hrisel lo tlem an awma, sawhthing lei leh a man chungchangah pawh thil fel lo tlem a awm a ni tih chu, zep hauh lovin Zoram mipuite hriat tura lang tlang taka a puang kha a va ropui em.. Khatianga mahni sawrkar chhunglama thil fel lo awm chu thup bo leh mipui hriat lohva chulmam mai tum lova, thil dik lo awm thu lang tlang taka puangzar ngam sawrkar kan nei ringawt pawh kha kalphungthar sawrkar chu a va ni chiang em! ZPM tang fan fan.
Sawrkar hian hetia thil fel lo awm thu hi mipui hriata a puanzar hma hian, thil dik lo awm thu leh a titu hriat chian tumin rei tak a lo buaipuiin a lo chhui tawh ngei anga, thil dik lo a awm ngei a ni tih a hriat hnua puangzar ta chauh a ni ngei ang. Hetianga mahni chhunglam atanga thil dik lo awm chu ngaimawha, a dik loh dan leh a titu chhuia puangzar ngam zel chu Sawrkar tha, rinngam leh innghahna tlak a ni dawn lovem ni?
Nimahsela, chumi tak chu mi rilru hrisel loho chuan a ngaite bawkin, mihring ngai ho bawkte chuan anmahni chhuichhuah niawm takin sawrkar chu beih let nan an han hmang leh ta hlauh chu a nia leh! Sawrkar lai itsikna leh lal ve thuai thuai chakna chuan a tur ut uta, remchang apiang leh remchang lo chung pawhin, an hmuh leh hriat apiang chu eng hmanrua atan pawh hmang duh zelin, sawrkar beihna remchang hmu inti fahranin, ‘ ZPM sawrkarin sawhthing leina man vbch. nga a tichingpen’ tih vel lam chu platform hrang hrangah patling thankin pui pui chuan an aupui leh ta dut dut duh chu a nia leh! Zahthlak zawkin.
Fim taka ngaihtuah duhtu tan chuan ZPM sawrkar thil tih dan chu a zahawma, opposition thil tih dan chu a zahpuiawm zawk a ni. Ngaihtuahna fim nei ngai lo, sawrkar tihmualpho leh beih chak hrim hrimho erawh chuan, ‘ ZPM sawrkar chu chawh tak rawh se’ ti tawk pawh an awm teuh tho ang.
FIR lo thehlut tawk pawh an awm em ni kha? A va tul lo tak em. Midang lo buai ve em em ngai lovin, ZPM sawrkar chuan thil dik lo awm chu a hriaa, amahin a buaipuia, a chhui zo tawha mipui hriat turin a puangzar tawh zawk a nih hi. Chumi kara midang lo chhuitir tum ve vel hi ram leh mipui hmangaihna vang nge, hmanhmawh taka tul lo taka kan lo inhambuai vena mai mai zawk?
Sawhthing lei leh a man vela thil fel lo a awm tih sawrkarin a puanzar hnu thla khat velah, Mizoram Agricultural Marketing Board chu an Chairman Chief Minister hova ni 3.11.2025-a thu khawm chuan, kha thil fel lo kha chhuichhuah a nih tawh thu leh, sawrkarin a pawisafaia a lo la pek loh a nih thu an sawifiahte hi a va lawmawm em.
Social media leh thu sawi theihna thil leh hmun hi a tam tak vang nge ni, heti em ema tun ZPM sawrkar beihna leh diriamna ringawt mai opposition hoin an chhakchhuak hi a mak zawk a ni. Social media lamah phei chuan, tute nge an nih kan hriat lohte hian chin tawk nei lek lova tawnngkam bawlhhlawh leh chhe tinrengin, a lo chhiartu nih pawh zahthlak khawpa tawngkam hnuaihnung leh zahpuiawm tak taka rak reng an awm bawka. He hun hnuhnunga mihringte rilru khawloh tawh zia lantirna leh, mi tha leh thil dik apiangin do leh huat an hlawh zawk zelna tur hi a lo lang chiang zel zawk em ni le?
Zofate zinga mi bik leh mi pakhat, a hlawhtlina leh a ropuinate, a tawnhriat leh tawrhna zawng zawngte, a dai chin leh Zofate tana a lo tangkai tawhna zawng zawngte chu engtik khawtikah mah tluk ve lo tur leh, dinhmun inthlau lutuk leh er pha lo lutuk hoin Pu Lalduhawma an lo era, lo itsik leh an lo thik ve em em ringawt hi zahthlak ka ti a, tawngkam chhe tak tak leh mawl tak taka an ti bawih bawih thin hi zahtheihlohthlak ka lo ti a, mihring tiha mawi pawh ni lo, ramhuai tih ni zawk awm tak a ni.
ZPM leh Pu Lalduhawma heti taka an er leh an bei hi chu thik tham leh er tham a awm a ni ange. Er tham leh thik tham loh chu tuma’n an bei reng ngai lo. A beitute tum leh duh lah chu hai rual loh, lal leh sum chunga thu neih leh thuai thuai nana mipui hmin tum, FCAA te pawh hlauh tak tak vang pawh ni lo leh ram hmangaih tak tak vang pawh ni lova, lal theih nana mipui fuihpawrha boruak siam hluai tum vang mai mai tih hriat reng a ni a. Mahse, thil reng reng hi a lo chhuahna rilru a dik loh chuan mi rilruah a nung thei tak tak lo a nih hi. FCAA insawihthaih pawh a sawt tak tak vak loh hi. Chuvangin, hetia ZPM an bei chiam chiam reng pawh hi Setana hnathawh pawh a ni ta ve ang.
He leiah hian tumah dik famkim leh thil tha tidik famkim thei kan awm lo. Mipui mihringte hi kan dik chuan loh avangin, ZPM sawrkar pawhin thil dik famkim a ti thei bik lova, tidik famkim leh thianghlim famkim turin kan phut ngawt thei bik hek lo a ni. Kalphung siam that tur a tam tawh em avang leh kan beisei san lutuk avang zawk hian, mihring duhthusam chin tawk nei lo hian duh khawp lohna leh selna ankate han chhakchhuak ve thin bawk mah ila, a hmaa mite ai thlawt chuan mipui nen kan inhnaiha, an lang tlang zawk bawka, an la beiseiawm zawk fe hrih chu a nih hi.
Mipui lam hawi an nih avang leh kan inhnaih lutuk avang zawk hian mipui pawh hi kan pangchangin kan phut sang tam lutuk hma mah mah pawh a ni maithei. Hetia mipui lam hawia inphahhnuai tak leh nem taka an kal avang hian opposition ho lah chuan an lo hmuhsit phah ve em em ringawta. Tawngkam na deuh deuhin engmah hre lo leh thiam loahte an chhuah deuh reng mai a nih hi.
Hetianga lal chak lutuk avang ringawta tawngkam chhe tinrenga kiltin atanga sawrkar beih ringawt atchilhtute party laltira, an lalna hnuaia ram awmtir leh chu a ropui bik vak chu a rinawm chiah loh a ni.
Beih dan chitin renga an bei chung pawh hian, a beitute hmel leh tunhma ka mitthla hian, kei chuan tuna sawrkar lai ZPM thlak nan chuan ka it thlawt lova, tunge Chief Minister ang tih ngaihtuah phei chuan a beidawn thlak ka ti deuh a ni.
ZPM hi anmahni aia tha lehzual an lo chhuak a nih ngawt loh chuan, Israel fate, hel hmang leh mi hahthlakho hnena Josua’n, ” Tuna kan Pathian biak hi tha lo in tih chuan, tunhmaa luirala kan awm laia pathiante kha em ni biak in duh leh zawk? Kei leh ka chhungte chuan Lalpa rawng a ni kan bawl zawk dawn” tih ang lampanga a sawi ang deuh khan, kei chuan, ZPM hi a tha zawnga an insiamrem chhoh zel chhung chuan ka la thlang ber hrih zawk chu a ni e.