Donald Trump-a chuan South Africa-a G20 summit lo awm turah he ramah hian mi ngo an tiduhdah nasa nia sawiin US chu a tel dawn lo tih a sawi.
US president hian South Africa-a Johannesburg-a khawvel ram hausa tak tak hruaitu intawh khawm nghah a ni chu ‘a dik lo’ tih a sawi.
South African foreign ministry pawhin White House thutlukna siam chu ‘pawi’ a tih thu sawiin ministry thupuangtu, Chrispin Phiri chuan summit hlawhtlinna chu ‘member pakhat tel lohah’ a innghat lo tih a sawi bawk.
South Africa-ah hian political party zinga tumahin an ramah mi ngote bituma chet lakna a awm an sawi hriat a la ni lo va. Heng zingah hian Afrikaner leh mi ngo tel tamna party pawh an tel.
BBC Newshour-ah Phiri-a chuan Trump-a hian ‘miin South Africa an awm laia chanchin mawi lo tak awm chu a thar thawh leh’ niin a sawi.
‘South Africa-ah mi ngote tihduhdah an ni tih finfiahna’ a awm loh thu sawiin, “South Africa hian hetiang buaina hi kan nei lo va, a awm pawhin kan ching fel ang a. Sualna hi chuan tu pawh a tibuai a, chi leh vun rawnga tuar bik an awm lo,” a ti.
“US tel lovin kan ti ang,” a ti.
Trump-a hian a social media platform Truth Social-ah “South Africa-a G20 nghah a ni ti a dik lo hle a. Afrikaner (an ram luahtu Dutch thlah bakah French leh German pem)-te thah leh sawisak an ni a, an ram leh lote pawh dik lo taka chhuhsak an ni,” a ti.
“Hetianga mihring dikna chanvo inpalzutsak hi a tawp lo a nih chuan US sorkar aiawh tumah an tel lo vang,” a ti.
South African sorkar chuan hetiang mi ngo suat anga sawina hi a dik loh thu leh finfiahna chiang awm lo a nih thu a sawi a. Court pawhin February thla khan hetiang a awm lo tih a lo sawi tawh bawk.
Trump-a hian a hmain South Africa hi G20-a tel tur a ni lo tih a lo sawi tawh a, summit an thlen turah pawh Vice-president JD Vance-a zawk a kal tur thu a sawi a. Tunah chuan White House chuan tumah an kaltir dawn lo tih a sawi leh a ni.
G20 summit hi member-ten kum tin an inthlen chhawk thin a, US hi South Africa dawta thleng tur a ni.
January thlaa a president leh hnuah Trump-a hian South Africa-ah mi ngo tihduhdah an ni thin tih a sawi thin a, May thla pawh khan hemi chungchangah hian Oval Office-ah African President Cyril Ramaphosa nen an inhnial chiam phah tawh.
G20 hi kum 1999-a Asia-a sum buaina nasa tak a thlen hnua din a ni a. A tel ramte hi khawvel puma hausakna 85% chuang neitute niin eibar ngialngheh nana hma latu an ni.