Parliament thlasik thutkhawm chu December 1-ah tanin December 19-ah zawh tur a nih thu Union Parliamentary Affairs Minister Kiren Rijiju-a’n a puang.
Thlasik thutkhawm neih hun tur hi Inrinni khan Rijiju-a hian X-ah tar langin President Droupadi Murmu-i pawhin sorkarin thutkhawm hun tur a ruahman chu a pawmpui tawh tih a sawi.
“President Pi Droupadi Murmu-i’n sorkarin parliament thlasik thutkhawm neih hun atana December 1, 2025 leh December 19, 2025 inkar a ruahman chu a pawmpui a ni,” a ti a. “Thutkhawm hlawk leh awmze nei tak, kan mipui rorelna ram tichak tur leh mipuite hlawkpui tur sawi chhuah a nih theih beisei a ni,” a ti.
Parliament thlasik thutkhawm hi Bihar assembly inthlan neih zawh hnu lawka neih tur a ni dawn a. Session chhung hian dan pawimawh tak tak siam hman tum a nih bakah ram chhunga thil thleng lian tham sawi a ni dawn.
July 21 atang khan fur thutkhawm neih niin August 21 thleng a awh a, vawi 21 thutkhawm a awm hman a. Thla khat awh thutkhawmah hian Lok Sabha-ah bill 12 pawm a ni a, Rajya Sabha-ah 15 pawm a ni bawk tih parliamentary affairs ministry chuan a sawi.
Fur thutkhawma pawm leh pharh zingah hian National Anti-Doping (Amendment) Bill, 2025; National Sports Governance Bill, 2025; Income-tax Bill, 2025; the Taxation Laws (Amendment) Bill, 2025 leh Indian Ports Bill, 2025 te pawh a tel.
Promotion & Regulation of Online Gaming Bill, 2025 pawh parliament fur thutkhawma pawm zingah a tel a, hei hi e-sports leh online social game chawikanna tur leh online-a pawisa khelh khapna a ni a. Fur thutkhawma dan siam pawimawh ber zinga mi a ni nghe nghe.
Nikum khan thlasik thutkhawm hi kumin aiin an tan hma a, a hun chhung pawh a rei hret a. November 25-ah tanin December 20 thleng a awh a ni.