Aizawl: November ni 11, 2025-a Dampa bial by-election neih tura atana inbuatsaihnain a vawrtawp a thleng tan. Pathianni zing khan he inthlanna neih tura polling station hla zual paruka inthlan buaipui tur (polling parties)-te’n an duty-na tur panin Pathianni khan an chhuak fel.
Dampa bial-ah hian polling station 41 awmin, chung zinga polling station parukte chu hmun hla leh kal harsatna hmun te niin, heng a duty turte hian Mamit DC complex Election Office kawt atangin lirthei 18 hmangin Pathianni zing dar 9 khan an chhuak a ni.
Inthlan buaiui tur feh chhuak te hi polling station paruk – Zopui, Silsury-I, Silsury-II, Silsury-III, Hnahva leh Lianbuang te a duty tur an ni. Dampa bial Assembly constituency huam chhungah hian Polling station 41 awmin, Thawhtanni zingah polling station 35 a duty tur te an chhuak ang. Polling station 41 zingah polling station pathum – Silsuri 1, 2, 3 te chu critical polling station niin, Zopui polling station chu ke a kal ngai a ni bawk.
Dampa bial by election lo awm turah hian National party pahnih – BJC leh INC, tualto party pahnih – MNF leh ZPM bakah unrecognised register party MPC ten an inchuh dawn a ni.
Dampa bial by-election hi Thawhlehni zing dar 7 atanga tlai dar 4 thleng vote thlak hun hawn a ni dawn a. Vote tla te hi November ni 14 khian zing dar 8 atanga chhiar tan a ni ang.
Tar lan tawh angin, Dampa bial-ah hian hmeichhia vote nei mi 10,185 leh mipa vote nei mi 10,605, a vaiin vote nei mi 20,790 an awm a ni.