Aizawl: Tun hnaia social media Mizo hnam lam cheraw kaihlek a, tihbawrhbarh a nih chungchangah a mawhphurtu, producer Rashwi Arora-in ngaihdam a dil.
November 7, 2025-a Mizo hnam lâm, cheraw kaihlek chu social media lamah thehdarh niin, sawi a hlawh hle. Hemi chungchangah MZP chuan a bul tumtu nia ngaih, Mizorama Red Bull Aizawl Tlang Ruam 2025 (Urban Downhill Racing) Aizawla buatsaihtute chu MZP Pisapui-ah koin thil awmzia leh thil nih dante an zawtfiah a. Reb Bull aiawha kalte Mizo hnam lam, cheraw kaihlek a, tihbawrhbang a ni chu pawi an tih thu an sawi a, he thila a mawhphurtu ber chu Contract an ziahpui zinga mi, Content Creator pakhat Yashwi Arora, Producer Red Bull India, a nih thu an sawi. Yashwi Arora hian Inrinni zing dar 7 bawr vel khan Mizoram a lo chhuahsan tawh thu an sawi bawk.
MZP chuan Red Bull hotute MZP Pisa-ah ngunthluk taka a sawipui hnua producer Yashwi Arora chu a mawhphurtu ber a nih avangin, Mizo mipuite hmaah ngaihdam a dil ngei an phut thut leh, ngaihdam a dil lo a nih chuan a tawp thlenga umzui an tum thu an sawi. Red Bull team te chuan MZP duh dan anga Mizo mipuite hmaa ngaihdam a dil ngei theih na turin Yashwi Arora hi an lo biak tur thu leh mawh an lo phurh tur thu an sawi bawk.
Pathianni khan Yashwi Arora chuan Mizo hnam lam diklo taka a tihbawrhban avangin MZP kaltlangin Mizo mipuite hnenah ngaihdam dilna lehkha a ziak a ni.
Hemi chungchangah Red Bull Aizawl Tlang Ruam 2025 (Urban Downhill Racing) Aizawla buatsaihah Mizo hnam lam, cheraw kaihlek chu an pawm zawng a nih loh thu MZP bakah Art & Culture Department, Mizo Cultural Organisation (MCO) leh Mizo Culture Artists’ te’n thuchhuah an lo siam tawh bawk.
Art & Culture Department chuan thuchhuah siamin, cheraw kân lai dik lo tak maia Aizawl veng pakhata entir a ni chu pawi an tih thu an sawi a. Hnam lâm hi a tibawrhbang zawng leh a zahawmna tihmelhem zawnga entir an phal lo tih mipuite an chah nawn a ni.
MCO leh Mizo Culture Artists’ pawhin thuchhuah siamin, tute emaw programme buatsaiha Mizo hnam lâm mawi lo taka entir a ni leh a video a darh vak mai chu an ngaimawhin an duh lo hle tih an sawi a. Mizo hnam lâm chi hrang hrangte chu hnam rohlu a ni a, chawi nuna tihlar zel an duh a, a hmasawn zawng ni lova hetianga uchuak taka lantir a ni chu an dem tih sawiin, hetiang zawng hian tumah che tawh lo se hma lak theihna chinah chuan na takin hma an la dawn tih an sawi bawk.