Aizawl: ZPM President Lalliansawta chuan an sorkar kum hnih chhungin an tum ang ngeiin eirukna lakah an minister leh MLA zingah hminghliau pakhatmah an awm lo chu an lawmna ber a nih thu a sawi.
Inrinniza Aizawl Press Club-a thu thar thehdarhtute kawmin ZPM president hian vanduaithlak taka Dampa bialtu MLA Lalrintluanga Sailo a boral avanga loh theih lohva by-election neih a tul ta chu pawi a tih thu a sawi a. He inthlan tur atan hian party tin te an tang a, ZPM party pawhin theihtawp an chhuah a, an campaign danah mi mal leh pawl hrang hrang leh party dang te rilru tina zawng emaw, mit timim zawng emaw pawhin an hriat loh hlanin an lo awm a nih chuan hriatthiamna dilin, Dampa bial mipuite chu ZPM candidate Vanlalsailova vote theuh turin a ngen.
Lalliansawta chuan Pathian leh mipuite duhsakna changin kum 2023 MLA inthlanpuiah sorkarna an siam a, kum hnih an sorkar chhung hian theihtawp an chhuah a, Mizoram leh Mizo mipuite tan pawh thil tha tam tak an ti tawh a, an ti mek zel bawk a. Hetih rual hian, mipui duhkhawp an tlin lohna lai te pawh a awm tih an hriat thu sawiin, “Tun term hmang zo tur hian kum thum hun kan la nei a. Mizoram leh Mizo mipuite tan ZPM hian theihtawp kan chhuah zel dawn a ni,” a ti.
ZPM sorkar kum hnih an hman mek chhunga eirukna lakah an minister leh MLA zingah hminghliau pakhatmah an awm lo chu an lawmna ber a nih thu sawiin, “Kan tum ang ngeiin eiruk awm lohna, langtlang sawrkar kan siam mekin ka hria a, lawmawm ka ti takzet a ni,” tiin, ZPM president chuan an sorkar kum hnih chhunga an thil tha tihte sawi vek sen ni mah se, an sorkar hlawhtlinna dahkhawmna ‘booklet’ siam turin an inbuatsaih mek tih a sawi.