Aizawl: Central YMA hruaituten Sairang – Vairengte inkar kawngpui dinhmun an enfiah a, Sairang leh Kawnpui inkar kawngpui siamtu contractor-te chu a hunah tak hna zo turin an chah.
Kawngpui dinhmun an enfiahnaah hian Central YMA President R. Lalngheta hovin office bearer pali leh CEC member 37-te chu Inrinni khan an thawk chhuak a, Vairengte thleng an kal a ni.
Central YMA hruaitute hi NHIDCL hotute leh an hnuaia contractor ten an hnathawh mek leh an ruahmanna hrang hrang an neihte an hrilhfiah bakah, hmanraw lak luh leh thil danga harsatna an tawhte an hrilhfiah a. Central YMA hruaitute chuan harsatna an neihte chu inhthlahrung lova an hnena thlen zel turin an hrilh a, kawng siam mekah tha taka an thawhpui tur thu leh an hnathawh dan chu an enzui zel tur thu an hrilh a ni.
Kawngpui dinhmun enfiahtu Central YMA hruaitute hi Kolasib Sub-Hqrs. YMA leh Awithangpa Group YMA hruaituten an lo dawngsawng a, Kolasib Sub-Hqrs. YMA Office leh Kolasib-a NHIDCL Office-ah kawngpui chungchang hi an sawi ho a, kawngpui tha neih a nih theihna tura Youth for Kolasib (YFK) hmalak dan an thlir ho va. Vairengte leh Sairang inkara four lane laih tan meka hnathawktu contractor te pawh kawmin, an hnathawh chungchang an sawipui bakah a nih dan tur ang taka hnathawk turin an chah a ni.
Central YMA hian kawngpui chungchanga an thil hmuh dan hi executive meeting-ah an sawi zui leh dawn a, Mizoram sorkar-a thlen tur leh NHIDCL leh contractor te la sawipui zui turte an sawi ho leh dawn a ni.
Central YMA htoute hi PWD hotute leh NHIDCL hotute leh an hnuaia contractor-ten an tawiawm a ni.