Iran-ah, a bik takin an khawpui, Tehran-ah favang laiin an beisei lawk loh takin khua a kheng nasa hle a, ruah sur a tlem a, tuikhuahte pawh a kang tep hlawm a. Thuneituten harsatna lian zawk an tawh loh nan mipuite chu tui ren turin an ngen.
President Masoud Pezeshkian-a chuan ruah a sur mai loh chuan Tehran-a tui sem chu a tahtawla kalpui a ngai dawn tih a sawi a. Mahni mamawh tawk zel sem chu a aia buaina zawk thleng tur venna pui ber tur atan erawh a tling dawn lo tih a sawi bawk.
“Sem hi a thawk vek dawn lo,” tiin Pezeshkian-a chuan a sawi a, “Tehran hi chhuahsan daih pawh a ngai mai thei,” a ti.
President thil sawi hi Iranian chanchinbu leh social media-ah sawisel a hlawh zui hle a. Tehran mayor thin, Gholamhossein Karbaschi-a chuan ‘nuihzatthlak’ tia sawiin ‘Tehran chhuahsan chu tih awm loh tak a ni’ tih a sawi.
Iran-a khaw chin zirtute chuan ni 10 lo awm leh tur chhung hian ruah a sur hmel loh niin an sawi.
Hetih lai hian tui a harsain an khawpuiah hian buaina a tling mek tawh a. “Inthiarna leh mamawh danga hman tur tui lei mai a ngai dawn a ni,” tiin hmeichhe pakhat chuan BBC Persian a hrilh.
Nipui lai khan Iranian rapper Vafa Ahmadpoor chuan social media-ah a chokaa tui herh haw tur a neih loh thu video a tar lang tawh a. “Darkar li nga ve a ni tawh a, tui in tur ka lei a, chu chu inthiar nan pawh ka hman a ngai a ni,” a ti.
Tehran tui lakna ber pakhat, Latian Dam-a manager chuan tui awm thei chin 10% chauh a awm tawh tih a sawi a. A bula Tehran leh Alborz province chawmtu Karaj Dam pawh a kang chat deuhthaw tawh bawk.
“He tuikhuah hi ka pian atangin a kangchah ka la hre ngai lo,” tiin putar pakhat chuan Iranian state TV a hrilh a. Karaj Dam manager Mohammad-Ali Moallem-a chuan ruah a tlak tlem em avangin a kangchat lo chauh tih a sawi.
“Nikuma sur aiin 92%-in a sur tlem a. Kan tuikhuahah 8% vel chauh a awm a, heti zat lek hi chu hman tham a ni lo,” a ti.