Vawiin, ni 11.11.2025 hian Dampa bial a MLA bye-election ah vote thlak a ni dawn ta. Tunge tling ang tih chu Zirtawpni hian puan a ni dawn a, inthlanna fel fai tak ni turah ngai phawt ang.
Party te campaign hunchhung a rei khawp mai. Inthlan tur hun puan a nih hma daihin party ten candidate an puang hlawm a, inthlan campaign pawh bul an tan nghal a ni. A tir atangin boruak a sang nghal hle a, a bik takin opposition lian ber MNF leh ruling party ten a key an la sang nghal hle. Opposition lian Congress pawhin boruak an rawn vawrh na hle bawk. BJP lam chu an innghahna central lam hotute an rawn thawk tlai deuh a, an thawm a zawi deuh a, a tawp lamah erawh an che na viau. PC party erawh boruak siam tum lem lovin an kal tluan thei thung.
Inthlan campaign-ah tunhma ang thoin party insawichhiatna lam a nasa tho a, opposition lamin ruling party chu rorel ngaihna hre lo, mahni party inhaivurna tura nasa taka che vel, mipuia hleih nasa taka nei angin an puh a, ruling party lam pawhin an hnathawh that leh policy lam sawi aiin tunhma a roreltute sulhnu pawr an aupui nasa hle.
Hetiang hi kan inthlan neih thin dan a ni a, kalphung kan la thlak lo hle. Bial tana an hmalakna tur road map han chhawpchhuak chat chat party kan la nei lova, a biala mipui retheihna behchhana hip tumna, sum leh pai senga thlan tlin nih tumna boruak bak hmuh tur a la awm chuang lo. Nasa takin ruai an buatsaih mup mup a, pawisa hmachhuana inthlanna, a ngai thoah kan lut leh chiang hle. Hmasawnna tura eizawnna kumhlun aiin sum insawihmuhna campaign a ni ber.
He inthlan campaign boruak hian kan ram dinhmun leh rilru a pholang chiang hle. Tun dinhmun atanga an campaign hla thlak a, a tak taka ke min pen pui tur hi kan ramin hruaitu a mamawh dik tak a ni si a.