Aizawl: Dampa bial by-election neih tur atana polling station hrang hranga duty tur Polling official-ten an duty-na tur hmun panin Thawhtanni khan DC Complex, Mamit atangin an chhuak fel.
Polling station 35 a duty turte hi General Observer M.T Reju, Returning Officer Malsawmzuala leh election official dangten enpuiin an vailiam a. Pathianni khan polling station paruka duty turte an lo chhuak tawh bawk.
Mamit district chhung Dampa bial by-election neih turah polling station 41 awmin, hetah hian Silsurry I, II, III te chu critical polling station an ni a, hmeichhe hlang duty-na tur Pink Polling station hmun nga-ah siam a ni bawk.
Tar lan tawh angin, Dampa bial by election lo awm turah hian National party pahnih – BJC leh INC, tualto party pahnih – MNF leh ZPM bakah unrecognised register party MPC ten an inchuh dawn a ni.
Dampa bial by-election hi Thawhlehni zing dar 7 atanga tlai dar 4 thleng vote thlak hun hawn a ni dawn a. Vote tla te hi November ni 14 khian zing dar 8 atanga chhiar tan a ni ang.
Dampa bial-ah hian hmeichhia vote nei mi 10,185 leh mipa vote nei mi 10,605, a vaiin vote nei mi 20,790 an awm a ni.