- Lalremliana Pachuau
Chhinga veng chuan Inrinni zan khân an LC leh Jt NGO tangrualte chuan, an veng chhûnga ILP nei lo zawn chhuah runpui an nei a. ILP nei lo khati zat an khawm thei ta mai khân, Aizawl mipui a ben harh ngei a ngai a nih kha! Rêl a lo luh hma pawh khân, kan ramah vai tamzia, Ramadan hunah a lo lang thin a. Hindu aiin kan ramah Muslim an awm tam tawh zawk niin alang.
Rêl a lo luh achinah nasa takin kan ramah vai an lo luh belh ta a. ILP check gate kal tlang lova lo lut emaw, thamna kal tlanga kan rama lo lut an awm ngei a rinawm ta hliah hliah a nih hi. Engtin nge khati zat ILP nei lo vaite kha, Aizawlah an lo luh theih tak mait Tunah hian Aizawl veng tin LC leh YMA lam hian tan lain, ILP nei lo emaw, ILP expired tawh vai khawrh chhuah runpui nei ta chiah se, Aizawlah hian dãn lova rawn awm a, ei rawn zawng a, an in lama kan ram pawisa thawn thla thin eng zata tam awm tak ang maw?
Chhinga veng hmalakna entawna veng tinin ram leh hnam humhalh tura ke an pen a ngai hle tih a lang. Rêl hian hna tam tam a rawn siam a. Chu chu a ram leilung fate’n kan chan si loh chuan, a pawi em em ta a ni. Sawrkar hian ILP hmanga khualzin khuahkhirh a tum thu a sawi nasa hle. Mahse, tun dinhmuna a hmalakna hi a tâwk zo rih lo hle niin alang. Khawvel ram hmasawn, Europe leh US buaina chu, dãn lova an rama pem lut tam lutuk khu a ni a.
Kan ramah hian Illegal Immigrant tih tur ni chiah si lo, ILP nei lova kan rama khawsaa ei zawnna hna thawk an tam hle reng hi vei nasat zual a va hun ta êm! He mi lo do letna atâna Labour Dept pawimawhzia, mahse eng vak mah hna ropui a thawh si lohzia kan hmu lawi a. Khawvel sawrkar lianteah leh India sawrkara Dept pawimawh leh lian zingah, Labour & Employment hi a tel ziah laiin, Mizoramah erawh englai mahin Dept lian leh pawimawha ngaih leh dah a ni ngai lo! Mipuite pawh he mi kawngah kan harh chhuah thar a ngai hle.
Veng tinah hian ILP nei lova hna thawk an tam hle ang. Heng mite hi dap chhuah vat vat a, an ram lama thawn kir thuai thuai a ngai a. Chutih rual vekin, ILP pêk chhuahna leh ILP nei lova vai rawn luhna hi kan ngaih pawimawh em em a ngai ta a lo ni e. Chhuanlamah vaiho hna thawh ang kan thalaite’n an thawk peih lo kan ti thin. Mahse, tunlai chhana thangtharte zingah eng hna mah thawh hreh nei lo an pung tial tial a.
Vaiho hna thawh ang thawk thiam pawh an pung telh telh bawk. In sak, mutia leh labor hna hrang hrang thawk peih thalai kan ngah tawh lutuk tih i hre thar teh ang u. Vaiho aia tlema hlawh an phut sâng a nih pawhin, thil man tozia, in luah man sanzia ngaihtuah tel chungin, za hnih khata hlawk lo pêk tam hi ram leh hnam hmangaihnaah i ngai tawh zawk ang u.
A tawp berah chuan, veng tinah vaiho hian khawsakna tur in an mamawh vek a. In neitute mawhphurhna a sâng hle tih hre thar ang u. ILP Valid nei ngei chauh in luahtir ila, i duham huam huam lo ngam ang u. Vai pahnihin in in luahah an rawn dil che u hian, thla hnih khat hnuah vai eng zata tamah nge an lo chan tihte hi i thlithlai peih teh ang u khai. Hetianga dãn lova vai lo lut kan khuahkhirh vat loh chuan, a tuartu tur chu in tu leh fa te bak an ni dâwn lo.
Tin, Work ILP pêk chhuah leh dilsak kawngah pawh a chintâwk i hre thar bawk ang u. Vai duhsak êm êm, inremsiampui thin an awm an tihte hi, tak tak a nih ngai chuan, ram hmêlma in ni tih inhria ang che u. Vaiho hi i pawng huat ang u kan ti lo. I inhumhalh thiam ang u kan ti zawk a ni e.