Aizawl: Legal Metrology Enforcement, Mizoram leh Centre for Consumer Education, Mizoram tangkawp chuan Aizawl Bara Bazar-a sa chi hrang hrang zawrhna hmunte tlawhin Thawhlehni khan sa buk an enfiah.
The Legal Metrology Act 2009 tanchhanin Legal Metrology Enforcement, Mizoram leh Centre for Consumer Education, Mizoram chuan Aizawl Bara Bazar-a vawk sa, bawng sa, ar sa, sangha zuartute buk lai an endik a. An endik lai hian a tlangpuiin bukna a dik a, digital khawl hmangtute chu thuneitute endiktir thin tura hriattir an ni.
Centre for Consumer Education Chairman Lallunghnema chuan Bazar sa buk an enfiah chhan chu sa chi hrang hrang zawrhte chu buk tling lova hralh chhuah a ni thin tih an hria a, tehna tling lo avangin consumer-ten sum tam tak an sen belh thin tih a sawi a. Kristian ramah buk leh teh dik lo hi a inhmeh loh avangin, sa zuartute chu tling leh fel taka sa buk a hralh chhuak thin turin an ngen tih a sawi.