Aizawl Maumual-ah ‘Distribution of Land Passes at Maumual House Site Plan’ neih a ni a, Revenue Minister B.Lalchhanzova’n document felfai nei mi 456 hnenah land pass a sem chhuak.
Land pass sem chhuahna inkhawmah revenue minister chuan, “Minister nih hi ka inbeisei ngai lo va, minister rau rauah pawh ka chak loh ber chu revenue department chan hi a ni ang. Kum 2023 inthlanah ZPM-in sorkarna kan chang a, he department chang tura min ruat pawh khan ka huphurh tak zet a, minister nih hnuah Maumual ram leh hmun dang tam tak ram chinfel ngaiin min hmuak nghal,” tiin, tuna Maumual ram chin fel a nih theihna tura tha thawhtute zawng zawng chungah lawmthu a sawi.
Minister chuan tuna revenue department-in a hmalaknaah ram 3,61,188 teh fel tawh a ni a, ram pass lem a awm thei tawh lo turah an ngaih thu sawiin, sorkar kal tawhten an phak tawk leh tihtheih angin hma an lo lak tawhnaah lawmthu a sawi a. Tunah Maumual bik an ching fel thei ta chu lawmawm a tih thu sawiin, “Mi tam takin he ramah hian in an sa chho tawh dawn a, ram buai awm tawh lo va, inngeih taka awm tlang turin ram neitute ka ngen duh a ni,” tia sawiin, Maumual 2nd Phase pawh chin fel leh thuai tura a ngaih thu leh, ram inchuhna leh chumi avanga buaina tam tak a awm a, duhamna vanga tawk chin nei turin a chah.
ZPM thuchhuah tar lan danin Chaltlang ram, Maumual-ah hian house pass 829 bawr vel atangin Govt. Land Bank leh Land Lease eng emaw zat a awm a, mi mal ram 740 bawr vel awmin ram buai a tam em avangin ram nei tan pawh kutthlak hleih theih a ni lo va, revenue minister hmalaknain re-survey neih a ni a, department-in theihtawpa hma an lak zui hnuah chin fel a ni ta a ni.
Thawhlehni hian Land Revenue & Settlement Department chuan a hmunah khawl nen thutchilhin, LSC awlsam chi leh rintlak zawk tur, Record of Rights (RoR) an sem chhuak a ni.