- K. Hmingthankaia
Hla phuahthiam Pu Vankhama fapa Pu Vanhmingliana (Taua) chuan, zing atanga khawlaia addict ho tam lutuk chu hnam mualphona a nih thu mangang leh thahnemngai takin chanchinbuah a rawn sawi tawha. Ka’n tuihnih ve ange.
Tunhnaiah Mizoramin tlawhtu kan ngah thar tan thut. An la pun belh zel pawh a rinawm bawk. Min tlawhtute hian an rawn hmuh tum leh duh ber chu, kan ram leilung khuarel awmdan ang ang leh, keimahni awmdan ang ang, social life leh culture hi a ni. Min tlawhtute lakah hian lo inrin lawk tehchiam hleihtheih pawh hi a ni chiah lova, kan nihna dik tak leh kan kalphung, kan nunphung dik tak hi nghet taka lo lantir mai hi a tha mai a ni. Sawrkar lam erawh chuan kawng hrang hranga a tih tur leh Tourist lo dawnsawn dan tur chu a inbuatsaihin, mipui zirtirna leh thuchhuah eng eng emaw pawh chu a ti zel tur a ni ang.
Chutih rual chuan khualzin laka min tizak thei leh, a hnam leh a ram anga kan mualpho zau zel theihna tur eng eng emaw a awm a ni. Chu’ng lakah chuan rang taka hma kan lak a tul ang.
- KAWNG: Tun atangin khualzinten kan kawng chhiat thu an sawi tan an ti. Chu pawh chu kan nihna dik tak chu a ni. Kawng thuah hian engtinnge tihdan danglama hma kan lak ang tih hi kan vaia tih tak zeta kan ngaihtuah a ngai ta tak zet e. Kan ram kawng thuah hian tute mah inmawhpuh khawtlai lova kan vaia tanrual a ngai tak meuh tawh a ni. Tute mah leh tu party leh sawrkar mah inmawhpuh a ngai lo.
Kan ram kawng enkawl harsa leh hautak zet hi tun dinhmuna kan ram state inrelbawlna tereuh te ang hi chuan a enkawl tha zo ngang lo a ni ber a ni. Tun sawrkar atang tal hi chuan kawng siam leh enkawl danah hian tihdan dang tha zawk hmuhchhuah i tum teh ang u.
Sawrkar kal tawh leh tuna mite pawhin kawng thuah hi chuan tumahin hmingthat an hlawh zo thei lo a nih hi. NH lah ni se, a enkawltu NHIDCL lamin thahnem an ngai duh lo lui tlat mai si a. Chuvangin, keimahni tan leh khualzin kan neih belh zel theih nan kan vaia bengsika kawng chungchang hi kan ngaihtuah ran a ngai ta a nih hi. Tun atang hian sawrkar pawhin tih tak zetin kawngah hian insawrbing teh se. Kawng pawh hi flagship programe-ahte nei teh se.
- ADDICTS: Kan khawtlang nunphung leh kan tualzal nun, kan social life hre turin kan zingkar nunphungte, zing kan thawh hma leh tlai dante, kan zing bazar leh zing inkhawm dan leh thil dang dang hriat tumin khualzinten min en chik dawn. Sawi chhawn leh ziah chhawn atan bakah, a video thlengin an nei dawn.
Min tlawhtute kal tamna lai tur ber kan khawlai lunlai apianga Addict bal tawp tak tak leh zaktheilo em emte, lo mu bungbu kutte leh lo inchiu mawlh mawlh hmuh tur tam lutuk hi an mit la tur berte an ni.
Addict zakthei lo leh dawthei em emte, rukru rual ni bawk hote hi engtikah mah kan siamtha dawn chuang lo. Dawt hlang mihring chanve an nih hi. Chuvangin, a khung khawm bona siama chawm mai hi sawrkar leh khawtlang tan pawh a tha mai a ni. Thil dang zawng aiin hengho vang hian kan la hmingthang dawn. Min la tizak dawn chauh. Nakin lawkah chuan khualzin pawisa lo dil tawk emaw, thil lo ruksak tawk emaw, dawt lo hrilh leh lo bum tawk emaw, lo suam leh lo rawk tawk emaw an la awm ngei ang. Chuvangin, hengho khungbo ran hi a tul tak meuh.
‘Aizawla rukru rualho chhuah zalentute khan khung khawm leh tawh rawh u’ tih ka ziah tawh ang khan, hengho lama lo tanga, lo chhuah zalentute pawh khan tifuh in intih ka ring tawh chiah lo. Sawrkar pawh hian hengho hi siamthat beiseia sum tam tak senga, mihring tam tak leh hun leh tha seng vak vak lo hian, a khung bona tur siama chawm mai hi a finthlak zawk ang. Vawiina la ti ve lo naupang zawkte, nakin lawka ti ve mai theite ven uluk lama tan lak hi ram leh hnam tan a pawimawh zawk.
- TRANSPORTATION: City bus- Kan nitin nunphung hriat duhin khualzin thenkhat chu kan city bus-ahte an chuang dawn. Stand-a bus ding rei lutuk leh, chutih kara driver leh conductor zu rim nam vung vung leh mei zu khu vung vung te an hmuh fuh chuan mak an ti dawn. Conductor-te chin than, pawisa kir duh lohte hi hnamdang khualzin lakah phei chuan an chin lehzual phei chuan a la zahthlak dawn. Hetiang tih chingho khan sim rawh u.
Bus chuannaa kan Zonun ze mawi lantir thinte kha kan inpawlhsawp lutuk hnuah hian a lo bo zo ta ti tih maite hi a pawi em ema, khatiang thilte kha khualzin hmuhah kan mawipui dawn teh reng nen. Hawh u, khawng deuh pawhin i inzirtir thar tha leh ang u.
City bus- te hi khawpui hmel lanna leh cheimawitu an nih ve avang hian, kan city bus ruangam leh a chhunglam kan enkawl(conduct) dan leh a service system hrim hrimte hi tih danglam leh tih changkan a hun ve tawh hrim hrim a ni. Tuna kan awmdan ang hi chu a changkang loin, a zahthlak tawh lam chu a ni e. City bus chungchang pawh hi chanchinbuah hian ka sawi zing ta tlauh tlauh mange.
Rental car pawhin khualzinte laka to uchuak bika bill in siam chuan a la pawi thei a ni. Tuten emaw a rate dik an lo hrilh leh thei si. Hnam rinawm lo nihna a ni thei a nia aw. Kan hawihhawma kan rinawm zawh poh leh keimahni leh kan ram, kan hnam tan a hlawkna a lo let zel dawn a ni.
Taxi ho eng chi pawhin, pawisa hmuh teuh theihna remchang tiin hnamdang khualzin lakah chuan man uchuak tak lak ching suh u aw. Hnamdang khualzin laka kan lan mawi theihna in nih kha hre reng ula, hnam timuphotu ni lovin, hnam timawitu nih tum zawkin HAWIHHAWM leh RINAWM takin khawsa thin ang che u. In Mozo-puite laka in tih thin pawh kha ti lo hram ang che u.
- INTHIARNA: Kan rama vantlang tana inthiarna awm fumfe lo lutuk hi chu a va hreawm rei tawh em. Hnam changkang ber ang maiin kan khawsaa, hnam changkangin a ken tel leh mihring nuna bet tlat inthiarna fumfe leh fai vawiin thlenga kan la nei thei lo hi a zahthlak bakah, a hreawm fo thin. A awm chhunte lah kan la mawl zia tilangtu mai an la ni si a. Khawimaw lai laiah chuan awm ve zeuh zeuh mah sela, enkawltu leh mawhphurtu awm si lo chu a la tawp em em reng tho a ni.
Office thenkhat leh mipui punkhawmna hmuna vantlang tana inthiarna tur fumfe kan la nei thei tlat lo hi a hreawm thin. Office bangahte hian, ‘Hei hi i office a ni a, vawng fai rawh’ tihte hi an han tara. Inthiar mamawh hle mah ila, kan office-ah chuan kan tan inthiarna tur a lo awm leh si lova, ‘ Staff only’ tiin an lo kalh leh bur thin site hi kan la ngaihtuah chiang tawk lo a ni e. Tunge chabi dil ngam tawh ang. Hmundang pan vang vang a ngai thin a nih hi.
Chuvangin, khualzinte bakah, Mizo mipui vantlangte hian inthiarna fumfe leh felfai hi hmuntinah kan mamawh em em a ni.
Awle, pawnlamah mi changkang ber anga lan tum thin mah ila, kan chhunglama kan changkan tak tak lohzia chu keimahni theuhin kan hriat chian hi. Mahse, kan chhunglam zawng zawng hi khaulzinten an hmu vekin an hre vek thei lo. Amaherawhchu, kan chhunglam tak loh zia leh lemchang kan nihna chu thup thei mah ila, langsar tak leh hmuh awlsam, mahse, midangte hmuh tlak loh leh hriat tlak loh ho, kan siamthat theih thil hi chu i siamtha zung zung teh ang u.
Miten, hnam rinawn leh tlawmngai, Kristian tha tak ram hmuha min hmuh an tum hi, tun atang chuan khualzinte vang chauh pawh hian tih hlawhtlin i tum zel theuh tawh ang u. Tun atang chuan thliarkar rilru tereuh te pu tawh lovin, a tha zawnga rilru zau tak put ve tum tawh ila. Khualzinte hi kan insiamthatna bul lo ni zawk hlauh sela. Min tlawhtute hi kan changkanna leh hmasawnna bul, kan hausak phahna bul leh, khawvel laka kan hming mawi nan i hmang hlauh ang u aw.