Rimawi huanga award ngaihhlut Thazual Award-a best female artist la ta lo BZ-i Tochhawng chungchangah amah ngaisangtu leh a zai ngainatute atangin lawm lohna a tam hle a, a fans te chuan a hla zawng zawng hit puitu BZ-i chuan dawng ngei tur nia an rin laiin, Ruatpuii zawkin a dawng ta a nih kha.
Hemi chungchangah hian BZ-i Tochhawng chuan, a zai ngainatute chu la na lo turin Thalai Times kaltlangin a ngen a, Ruatpuii chu a thinlung taka a lawmpui thu leh, a tan pawha hriat nuam lo thusawi nei lo tura ngenin, amah phei chuan dawn a inrin loh hrim hrim thu a sawi.
‘Ka dawn kha ring lo hrim hrim a, nominee-ah pawh ka vawikhat lanna a nih avangin vuivaina engmah ka nei lo. Ruatpuii kha kei aia platform lo luah hmasa tawh leh mipui hnena hla tha tak tak lo hlui tawhtu a ni a, a la lovang tih kha ka hlauhpui tak zet,’ a ti.
A hla lo ngainatu tam tak an awm chu a lawm tak zet thu ‘I Mawi ber’ satu chuan sawiin, chutih laiin a thiante tana hriat nuam lo tur leh vuivai zawnga lakpui lo turin a zai ngainatute a ngen a, thinlung taka lawmpui zawk tur leh amah pawh hla ruahtham loh nen lo kir leh thuai a tum thu a sawi bawk.
BZ-i chuan award a lak loh chungchang sawizuina chu awm tawh lo se a duh thu Thalai Times hrilhin, Ruatpuii chu thinlung taka a lawmpui thu leh, a hla ngainatute pawhin lawmpui zawk se a duh thu inngaitlawm taka sawiin, a ngen bawk a ni.