Khua a vawt chho hret hret a, thlasik kan thleng chho mek zel. Kumtawp a hnaih tawh avangin mitinin intihhlimna leh inlakthawven hun kan nei chho tan zel a, kan fimkhur sauh sauh erawh a tha hle.
Khua a vawh a chhoh zel avangin intih lumna turin meichhem leh electric hmang chi lumna hrang hrang kan mamawh chhoh leh hle dawn a, kangmei chhuak thei lakah kan fimkhur sauh sauh zel a tha awm e.
Kangmei hi amahin a chhuak ngawt thei lo a, inventheih a nih miau avangin kan inven lawk thiam fo a tul. Kan electric line a fel em, tih leh kan meichhemna hnu kan timit tha em tih thlengin en uluk thin ila, vanduai palh liau liau chu awm thei bawk mah se, vanduaina thleng thei tam zawk erawh kan fimkhur leh fimkhur loha innghat a ni tlangpui thin.
Khawvel a changkang zel a, electric kan mamawhna a sangin, intih lumna hrang hrang a tam tawh a, hengte hi fimkhur taka kan hman a, kan electric line kan check fo pawh a tul hle a ni.
Kangmei chhuak avangin mi tam takin nunna an lo chan tawh a, in leh lo tam tak chan an lo awm tawh bawk. Inzirtirna lam hi uar sauh sauh ila, fimkhur tura inhrilhhriat hi bang suh se.
Keimahni theuh kan fimkhur a, sorkar in kaihhruaina leh fimkhurna tur hrang hrang a siamte kan zawm hi kan duty a ni a, chutiang tur chuan sorkar pawhin fimkhurna thuchhuah tun atangin nei mawlh mawlh tawh se a va tha em.