Aizawl: Lawngtlai Bawrhsap Donny Lalruatsanga leh Lawngtlai Sr. CMO Dr. Lalmuanawma Jongte te chuan tun hnaia Kakichhuaha tui hri nia hriat leng mek chungchangah hmalak san turte Nilaini khan DC Office Chamber-ah an sawi dun.
Bawrhsap chuan tui hri nia hriat leng mek avanga nunna chan hial an awm chu pawi a tih thu a sawi a. Hri leng mek thlentu dik tak hre tura chak taka hmalak mek a nih thu sawiin, hri leng mek a darh lohna tura hmalak chu tihmakmawh a nih thu leh a tul anga hmalak a nih tur thu a sawi a. Mipuite chi ai lo turin a chah.
Sr CMO chuan November 4 atang khan damlo neih tan a nih thu a sawi a. November 11 khan medical team-in Kakichhuah hi tlawhin tui sample lak nghal niin ZMC&H-ah endik mek a ni tih a sawi.
Dr Lalmuanawma Jongte chuan Kakichhuaha hri leng hi Salachhuah (Myanmar) atanga luta an ngaih thu a sawi a. Kum 5 – 63 inkar te endik atangin tun dinhmunah he hri vei hi mi 27 awmin, thalai lamah hri kai an tam zual tih a sawi a. A kaihhruaina hnuaiah Rapid Response Team din tawh niin, Health Worker pakhatin a thutchilh mek a ni.
An inkawmnaah hian Kakichhuah chu chawlhkar khat chhung atan containment area ah puan ni se, medical duty, election duty leh rikrum thilah lo chuan tumah luh leh chhuah phal loh ni se an ti a. Damdawi tul ang angte chak taka pek ni se, hemi chhung hian Sr. CMO kaihhruiana hnuaiah zirchianna chak taka kalpui ni se an ti bawk.