Aizawl: Dampa bial by-election chu boruak muanawm tak hnuaiah tluang takin Nilaini khan zawh fel a ni a. He inthlanah hian vote tla hi 83.07% a ni.
November ni 11, 2025-a Dampa bial by-election inthlanah voter mipa 10,637 leh hmeichhia 10,231, an vaiin mi 20,888 awmah, vote tla zat hi mipa 8,921 leh hmeichhia 8,430, an vaiin mi 17,351 in vote an thlak a. Vote tla hi 83.07% a ni a. Hetah hian Postal Ballot hmanga vote tla chhiar tel a la ni lo va. Kum 2023 MLA inthlanpuia Dampa bial inthlana vote tla 86.23% aiin 3.16% in a tlem zawk.
Dampa bial chhunga vote tamna ber Silsury Polling station-ah vote nei zawng zawng 1,107-ah mi 899 in vote an thlak a, vote tla hi 81.21% a ni a. Vote tlemna ber Zopui-ah vote nei 29 awmah, mi 22-in vote an thlak a, vote tla zat hi 75.86% a ni.
Dampa bial by-election-ah zing dar 7 atangin vote thlak tan a ni a. Polling station 41-a inthlanna kalpuiah, polling station 39-ah vote thlak theih hun chhung, tlai dar 4-ah vote thlak zawh fel a ni a. Hetih lai hian, Silsury leh Marpara North polling station-ah te tlai dar 5:40-ah pawh vote thlak zawh a la ni lo.
Inthlanna tluang taka neih zawh a nih hnuah Polling Station hrang hranga EVM & VVPAT hmanga vote tlate hi venhimna tha tak hnuaiah, Nilaini zing dar 4:27 khan District Election Office thlen felpui niin, EVM & VVPAT te hi vote chhiar ni, November ni 14, 2025 a lak chhuah turin strong room-ah venhimna tha tak hnuaia dah luh nghal a ni.
Dampa bial by-election-ah hian candidate panga – National party pahnih – BJP candidate Lalhmingthanga leh INC candidate John Rorluangliana; tualto party pahnih – MNF candidate Dr R Lalthangliana leh ZPM candidate Vanlalsailova bakah unrecognised register party MPC candidate K Zahmingthanga ten an chuh a ni.