Lai Autonomous District Council (LADC) inthlanpui neih turah political party pathumin an party ticket-a ding turte an puang.
Nilaini chawhma dar 11 khan ZPM party chuan an party pisaah an party candidate turte chu an president, Lalliansawta’n a puang a, bial 25-a inthlan awm turah an candidate turte an puang nghal vek a ni.
Candidate puan inkhawmah thu sawiin ZPM president chuan LADC inthlanpui awm turah an ruahmanna hmasaah Lawngtlaiah ngei candidate hming puan an tum a; mahse, inthlante an puan tak thut avang leh eng eng emaw avangin Aizawl-ah an puang ta tih a sawi.
Lalliansawta chuan candidate thlang tur hian a hmuna awmte atangin mi pariat awmna Search Committee an din a, kum tir atang khan candidate atana tha tur uluk taka zirin ngaihtuahna an lo seng tawh tih a sawi a. ZPM General Headquarters chuan Nomination Committee dinin tum nga an thu a, secret ballot hmangin heng mi 25-te hi an thlang chhuak tih a sawi.
LADC-a bial 25-ah hian din tum leh inbeisei mi 116 zet an awm tih sawiin ZPM president chuan, “Bial pakhatah mi pakhat chauh zel thlan a ngaih avangin bial chang ve ta lo an awm lo thei lo va, kan zavaiin Lai mipuite leh ZPM tan tang tlang a, theihtawp chhuah zel turin kan insawm a. State sorkar tha taka thawhpui thei tur leh LADC nghet tha tak din turin kan beisei a ni,” a ti.
MNF pawhin an party pisa, MNF Hnam Run-ah MNF President Zoramthanga’n a puang a. MDC bial 25-ah bial 20-a candidate turte a puang a. Bial nga – Sangau E, Sangau W, Paithar, M Kawnpui leh Sekulh te remchang hmasaah puan leh an tum tih a sawi.
LADC inthlanpui lo awm turah an candidate puan takte zingah MDC ni lai mi 11 chu elected member niin mi pahnih chu nominate, an vaiin mi 20 an nih thu Zoramthanga’n sawiin, “Nomination committee-in ngun takin a ngaihtuah a, tun tuma MADC inthlana candidate tura an thlan dan chu a hahdamthlak ber tum a ni ang. A lawmawm tak zet. Sorkar theih kan inbeisei a ni,” a ti.
Indian National Congress (INC) pawhin tum danga an tih thin angin, Lawngtlaiah an candidate turte an puang a. Tun tumah hian MDC bial 25-a inthlan neih turah bial 10 chauh an puang thung.