Kenya chuan a khua leh tui mi 200 chuangin Russia-in Ukraine a rûn mekah Moscow tan an bei mek tih a sawi a, silai latu agency hrang hrangin indonaa tel ve tur hian Kenyan lak tumin an la bei mek zel bawk tih a sawi.
Kar hmasa khan Ukraine chuan African ram 36 atangin mi 1,400 chuangin Russian sipaite puiin Ukraine an bei mek a, thenkhat chu inbumna hmanga Moscow tana thawk tura lak an ni tih a sawi.
Russia chuan African-te hi contract a ziahpui thin niin Ukrainian Foreign Minister Andriy Sybiha-a chuan a sawi a, hei hi ‘thi tura inhremna tluk’ reng a ni tih a sawi a. African sorkarte chu an khua leh tuite hnenah pawh hrilh turin a ngen.
“Russia-a sipai an lak hi African ram, Kenyan-te zingah ngei pawh huang an zauh a ni,” tiin Kenyan foreign affairs ministry chuan thu a chhuah.
“Kenyan 200 chuangin Russian sipaite an zawm tawh a… a latute hi Kenya leh Russia-ah rim takin an thawk reng a ni,” an ti bawk.
Ministry chuan Moscow-a Kenyan embassy pawhin an zinga thenkhat hliam tuar pawh an awm tih thu an dawng a, sipaia tang turte hi an visa, an zinna leh awmna tur $18,000 pek an tiam thin niin a sawi bawk.
September thlaa Nairobi bula hmun an dapah pawh indonaa kal tur Kenyan 21 chhan chhuah an nih thu ministry hian a sawi a. Mi pakhat man niin a chungthu ngaihtuah mek a ni tih a sawi bawk.
Ministry hian an chhanchhuahte hi an hna tur zawrha thlem an ni a, indona tak taka tel ve lo, drone lo rem khawm te, bawlhlo sawngbawl leh rawng hnawih vela tang tur angah an inngai niin a sawi.