Assam-a eptu party pasarih chuan tangrualin nakuma assembly inthlan an chuh dawn a, BJP leh a thawhpuite hneh an tum dawn tih Assam Congress President Gaurav Gogoi-a’n Nilaini khan a sawi.
“Vawiin khan kan ngaihdante kan inhrilh tawn a. Inhmuhkhawm hi kan lo tum sa reng tawh a… BJP-in nasa taka Assam mipuite phur an tihrih leh dik lo taka Chief Minister Himanta Biswa Sarma-a’n ro a relna hi kan hria a, nakum inthlanah kan bei dawn a ni,” tiin an thutkhawm zawha Gogoi-a chuan a sawi.
An thutkhawmnaah hian Congress bakah Raijor Dal, Assam Jatiya Parishad, Communist Party of India, the Communist Party of India (Marxist), CPI (ML) leh Anchalik Gana Morcha an tel.
Eptu party hlun tak, All India United Democratic Front (AIUDF) erawh an tel ve rih lo thung.
Gogoi-a chuan an thil sawiho zawng zawng a sawi lo va, an la inrawn zel dawn tih erawh a sawi thung.
“Tun hi nakum inthlan atana kan vawi khat inhmuh khawmna chauh a ni a. Lungrual takin BJP hi beiin paih thla turin kan bei ang tih erawh ka chiang a ni,” tiin Raijor Dal MLA Akhil Gogoi-a chuan a sawi.
Assam Jatiya Parishad President Lurinjyoti Gogoi-a pawhin an thutkhawm chu thil lawmawm a nih thu sawiin BJP leh a thawhpuite tan leh mipui tan thu thawn pawimawh tak a nih thu a sawi.
Chief Minister Sarma-a chuan eptute inthurual hi a ngai pawimawh lem lo tih a sawi a, eptute hian kum li leh a chanve liam tawh atang khan hetiang hi an ngaihtuah tawh a, ‘TV serial ang maiin’ an ti nawn sek tih a sawi.
“An kal khawm a, khualbukah thingpui an inho va, an kal darh a, inphatsanah an inpuh zui lehnghal a. Hetiang thil hi BJP leh NDA tangrualah a awm ve ngai lo,” tiin chief minister hian a sawi.
Congress telin, eptu party-te hi kum 2024 Lok Sabha inthlan dawnah pawh khan tanho an tum hle a, Assam-a bial 14 awmah candidate intawm rin tumin sawiho nasa hman hle mah se an puitlin thei lo.
Assam assembly-ah hian bial 126 awmah BJP hian MLA 64 an nei a. An thawhpui zinga mi, AGP-in pakua, UPPL-in pasarih leh BPF-in pathum an nei a. Congress-in MLA 26 an nei a, AIUDF-in 15 leh CPI(M)-in pakhat an nei a. Independent MLA pakhat a awm bawk.