Mizoramin boxer intawh khawm lian a thleng dawn a, Zirtawpnia ‘Battle in Mizoram’-a inhnek 15 awm turah UAE atang leh India ram hmun hrang hranga boxer thate an inlan dawn a, an zingah hian Mizoram mai ni lo, Indian boxer langsar ber ber ni mek – Laldinsanga, Zoramchhana leh Vanlalawmpuia te pawh an inlan dawn.
LPS Arena, Falkland Veng, Aizawla tlai dar 04:00 atanga inhnek turah hian a tir lam, Preliminary Bout-ah inhnek vawi sarih awmin Mizo professional boxer chhuak tharte an inlan ang a, en man a awm dawn lo va, live-in AiduPlay-ah en theih a ni bawk ang.
Zan dar 06:20 atangin Main Card-a inhnek pariat tan a ni dawn a. Mizo boxer thate bakah Assam atangin pahnih, Manipur, Haryana, Punjab, West Bengal leh UAE atangin fighter pakhat theuh an inlan dawn.
Main Card-a inhnek hnuhnung ber leh ngaihven hlawh berah WBC Youth Bantamweight kawnghren kawl mek, Dinsanga inlanin Bengali boxer tawnhriat nei tha, Mazhar Hussain nen an inhmachhawn dawn a, round 10 inhnek thei tura duan a ni.
Kum 33 mi, Mazhar-a hi kum 2018 atanga professional khel tan, vawi 12 inhnek tawha a tumpui vawi li a knockout nen vawi sarih hnehna chang tawh, vawi thum tlawma vawi khat hnehtawk nei a ni.
A inhnek hnuhnung ber chu April 25 kha niin Bengaluru, Karnataka-ah Sharwan Das lakah a tlawm a. Dinsanga nena an inhmachhawn turah hian a inbuatsaih that thu leh tlawm zawn a tum loh thu a sawi.
Mazhar-a hmaa ding tur, Dinsanga hi tun hnaia Mizoram Police-a lut, training mek a ni a, a duh ang tawka inbuatsaihna tha nei lo mah se a fit tawk tih a sawi.
Kum 22 mi, Dinsanga hian nikum November khan Bengaluru-ah tho Ghanaian boxer Michael Decardi Nelson hnehin WBC Youth bantamweight world title a hlawh chhuak a. A hnuah professional-ah vawi thum hnek leh tawhin a chak vek a, a inhnek hnuhnung ber chu May 25 kha niin GuiMing Li a hneh.
Farkawn tlangval hi Indian boxer zinga record neih tha ber pawl niin vawi 12 a inhnek tawhah chak vekin heng zinga vawi sarihah hian a tumpuite a knockout a ni.
Main card-ah hian Guwahati atanga inlan tur, Aman Ali leh Omega Lalramdina chu Super Featherweight-ah an inhmachhawn hmasa ber dawn a. Middleweight-ah Manipuri boxer Khongbantabam Jeckson Meitei leh C.Lalhruaitluanga an inhnek zui ang.
Lightweight-ah Mizo boxer pahnih, Lalruatfela Zote leh HC Lalramfela an insu dawn a. Middleweight-ah F. Lalthanliana Junior leh Guwahati atanga inlan tur, Arnab Chirua a hneh zui ang.
Featherweight-ah Brijesh Kumar leh Zotea an inhnek zui ang a. Kum 26 mi, Brijesh-a hi professional-a vawi li a inlanna tur niin chak a la nei lo va, a inhnek hnuhnung berah kar hmasa mai khan Shivam Sharma nen New Delhi-ah an inhnehtawk thung.
Zotea hi Mizo boxer lar a ni a, WBC India kawnghren kawl lai a ni a. Kum 26 mi bawk niin vawi 14 a inhnek tawha vawi 11 chak thei, vawi thum tlawm tawh a ni a. A inhnek hnuhnung berah September thla khan Vikram Singh Jestha lakak unanimous decision-in hnehna a chang.
Superlightweigh-ah Awp-a leh Punjab boxer Maninder Singh an inhnek dawn a. Awp-a hi professional-a a vawi 18 inlanna tur a ni a, heng zingah hian vawi 13 hnehna chang thei a ni a. May thlaa a inhnek hnuhnung ber khan Diyo Rimo Matam lakah unanimous decision-in a chak.
Awp-a hmaa round riat ding tura inbuatsaih, kum 22 mi chauh, Manider-a hi vawi riat a inhnek tawha pathum a knockout nen vawi li chak tawh, vawi thum tlawm a ni a. A inlan hnuhnung berah Bharany Velmurugan chu June thla khan TKO-in a hneh.
Hmeichhe inhnek tum khat awm turah Haryana boxer, Renu Phogat-i leh Dubai atanga inlan tur, Nastaran Fathi te Super Bantamweight-ah an inhnek dawn.
Kum 34 mi, Nastaran-i hi Iranian niin Dubai-a inbengbel a ni a, vawi 14 a inhnek tawha vawi khat chiah la tlawm a ni a, a inhnek hnuhnung berah February thla khan Victoria Torres Canul lakah hnehna a chang a. A hmachhawn tur, Rohtak atanga inlan tur hi kum 26 mi niin a inhnek hnuhnung bera chak lo a ni.
Battle in Mizoram hi Grassroot Boxing Promotions leh Crown Boxing Promotions ten Sete Boxing Academy nena tanghova an buatsaih a ni a, Indian Boxing Council (IBC)-in an hriatpui a ni.