Kumin January atanga October thleng khan Aizawl khawpui chhungah lirthei dan bawhchhia 7,864 man a ni tawh a. Dan bawhchhiate sum chawi tlingkhawm chu Rs. 69,95,900 a tling.
Aizawl Traffic SP thar C. Vanlalvena’n Mizoram Journalists’ Association (MJA) hruaitute lengah sawmin, thawhpuiah a sawm a. An inkawmnaa tar lan a nih danin kumin January atanga October thleng khan Aizawl khawpui chhungah lirthei dan bawhchhia 7,864 man a ni tawh a. Dan bawhchhiate sum chawi tlingkhawm chu Rs. 69,95,900 a tling a. Dan bawhchhia an man zingah No Parking-a lirthei dah an tam ber a. No entry-a tlan te, wrong side-a tlan te, traffic flow tibuai khawpa lirthei khalh leh driving licence nei lova lirthei khalh chu a tam zual an ni.
Aizawl Traffic SP C Vanlalvena chuan mihring leh lirthei pung zelah Aizawl khawpui chu enkawl a hautak hle tih a sawi a. Traffic Police-ten theihtawp chhuah ve bawk mah se, mipui duhthusam leh beisei ang tlin tawk lohna kawng tam takin an nei thei a, hetihrual hian theihtawp erawh an chhuah ve reng tih a sawi a. Theihtawp an chhuahna zarah tun hnaia Aizawl khawpui Traffic enkawl chungchangah UD&PA Department kaltlanga Sorkar laipui atanga Mizoramin Special Award an dawng chu an lawm hle tih a sawi.
C Vanlalvena chuan mi thiamte sawi danin, khawpui chhung lirthei chevel enkawlna chungchangah 3E an tih mai – enforcement, education leh engineer chu thil pawimawh a ni a, heng thil pathum zinga Traffic Police chan, enforcement leh education chu hlawhtling taka a kal theih nan MJA-in theihtawp an chhuahpui thin chu lawmthu a sawi a, theihtawp chhuah chhunzawm zel turin a ngen nghal.
Ram changkangah chuan khawlaiah Traffic Police duty hmuh tur an awm meuh lo tih sawiin C. Vanlalvena chuan, “Khawl hmangin thil tam zawk thunun a ni a. Mizoramah erawh ram leilung awm dante, kawngpui awm dan leh chhan hrang hrang avangin khawl hman remchan lohna a tam a. Lirthei chevel enkawlna kawngah erawh theihtawp kan chhuah a. Mipui pawhin duty te thu an awih zel a pawimawh,” a ti.
An inkawmnaah hian MJA President C. Lalrambuatsaiha leh a thawhpuite pawhin an ngaih pawimawh leh vei zawng hrang hrang an sawi a ni.