Ukraine chuan Russia nena mi tang inthleng tawn turin hma a la leh mek a, Ukrainian 1,200 chuang chhuah zalen an nih theih an beisei tih President Volodymyr Zelenskiy-a leh a Security Council chief-ten an sawi.
“Mi tang inthleng tawn leh tur hian ruahmanna siama hma lak mek a ni,” tiin Zelenskiy-a hian Pathiannia Telegram messaging app-a video a dah chhuahah a sawi a. “Vawi tam thutkhawm leh indawrna kalpui tawh a ni a, a taka tihhlawhtlin tuma beih mek a ni,” a ti.
A security chief, Rustem Umerov-a pawhin Inrinni khan mi tangte inthlang tur hian Turkey leh United Arab Emirates (UAE)-a indawrnaah a tel tih a sawi a, Kyiv tantu lamte pawh telin mi tang inthlang kalpui chhunzawm leh tuma hma lak mek a ni tih a lo sawi tawh.
“Heng indawrnaah hian lehlam lehlam pawhin kan pawm dante Istanbul-a kan inremna anga kalpui leh tha kan ti,” a ti a. “Ukrainian 1,200 chhuahna tur a ni ang,” tiin Umerov-a hian Telegram-a thu a chhuahah a tar lang bawk.
Ukraine-in hetiang an sawi chungchangah hian Moscow chuan eng thu leh hla mah a la nei lo thung.
Kum 2022 khan ram pahnihte hian Turkey palai hna thawhna zarah Istanbul-ah mi tang inthleng tawn tur hian inremna an lo siam tawh a ni.
Inremna ang hian mi an inmansak sang tel an inchhuahsak tawn tawh a, hetih lai hian tun hnaiah ramri velah inbeihna nasa tak a awm thar a, hei hian an inremna anga thil kalpui zel hi a tikhaihlak rih mek.
Russia-in February, 2022 atanga Ukraine a rûn hnuah khawi lam ve ve pawhin mi an inmansak nual tawh a ni.
Umerov-a chuan inrawn khawm leh thuai tur a nih thu leh hetah hian thil kalpui zel dan tur leh a hun turte pawh an ruahman a rinawm tih a sawi.
“Tha thlah lovin Krismas leh kum thar hi Ukrainian tang mekten an inah, an chhungte leh an hmangaihte nan an hmanho ngei theih nan hma kan la mek zel a ni,” tiin Umerov-a chuan a sawi.